यावल (प्रतिनिधी) तालुक्यातील चिंचोली येथील आडगाव फाट्यावरील हॉटेल बाहेर कारमध्ये बसलेल्या एका व्यक्तीवर दुचाकीवरुन आलेल्यांनी गोळीबार केला होता. याप्रकरणी आज जिल्हा पोलीस अधीक्षकांनी घटनास्थळी भेट देत पाहणी केली. या प्रकरणी अज्ञात व्यक्तीविरुद्ध गुन्हा दाखल करण्यात आला आहे. तर परिसरातील सीसीटिव्हीचे फुटेजची तपासणी केली जात आहे.
जळगाव शहरातील चंदुआण्णा नगरमधील प्रमोद श्रीराम बाविस्कर (वय ४०) यांच्या पुतण्याचे यावल तालुक्यातील चिंचोली गावाजवळील मनुदेवी फाट्याजवळ रायबा नावाचे हॉटेल आहे. दरम्यान, प्रमोद बाविस्कर हे १० जुलैला पुतण्याच्या मनुदेवी फाट्याजवळील हॉटेलवर गेले होते. दरम्यान, प्रमोद बाविस्कर हे रात्री ९.३० वाजेच्या सुमारास मनुदेवी फाट्याजवळील हॉटेल रायबा बाहेर परत जळगाव येथे येण्यासाठी कार (एमएच- १९, सीएफ- ३३५३) मध्ये बसले होते. या वेळी त्यांच्या बाजूला त्यांचे किनगाव खुर्द येथील मित्र रतन रमेश वानखेडे (वय ४२) हे देखील उभे होते. याच वेळी दुचाकीवरुन दोघे जण झाले. दुचाकीच्या खाली उतरून एक अनोळखी तरुण प्रमोद बाविस्कर यांच्या कारजवळ आला. त्याने त्यांना मला बियर पाहिजे आहे, असे सांगितले. परंतु, बाविस्कर यांनी हॉटेल बंद आहे, तुला जर बियर हवी असेल तर किनगाव येथे जा, असे सांगितले. याच कारणावरुन त्या अनोळखी व्यक्तीने आपल्याजवळील पिस्तोल काढले आणि प्रमोद बाविस्कर यांच्यावर दोन गोळ्या झाडल्या होत्या. यात बाविस्कर यांच्या छातीत एक तर एक गोळी त्यांच्या उजव्या खांद्याजवळ लागली. तर गोळी झाडून हे दोघेही किनगावच्या दिशेने दुचाकीने पसार झाले. तर जखमी अवस्थेत बाविस्कर यांना जळगाव येथील खासगी रुग्णालयात दाखल केले होते. सध्या त्यांची प्रकृती स्थिर आहे.
रुग्णाची भेट घेत घटनेविषयी घेतली माहिती
या घटनेप्रकरणी यावल पोलिसात एका अज्ञात व्यक्तीविरुद्ध गुन्हा दाखल करण्यात आला आहे. तर दुचाकीवर आलेल्या दोघांचा पोलीस शोध घेत आहे. दरम्यान, घटनास्थळी रात्रीच जिल्हा पोलीस अधीक्षक डॉ. महेश्वर रेड्डी, अप्पर पोलीस अधीक्षक अशोक नखाते हे पथकासह घटनास्थळी दाखल झाले होते. तसेच त्यांनी आज रुग्णालयात जावून रुग्णाची भेट घेत घटनेविषयी माहिती जाणून घेतली. तर शुक्रवारी डिवायएसपी अण्णासाहेब घोलप, पो. नि. रंगनाथ धारबळे यांनी धानोरा तसेच किनगाव येथील मुख्य राज्य महामार्गावर असलेले सीसीटीव्ही कॅमेऱ्यांची तपासणी केली. तर या गुन्ह्यातील आरोपींच्या शोधाच्या दृष्टिकोनातून सीसीटीव्ही फुटेज उपयोगी पडणार आहेत. या गुन्ह्याचा तपास पो.नि. रंगनाथ धारबळे, पो.उ.नि. एम. जे. शेख, हवालदार वासुदेव मराठे करत आहेत.
