जळगाव (प्रतिनिधी) संपूर्ण जगभरासह जळगाव जिल्ह्यात कोरोना विषाणूने थैमान घातले आहे. कोरोना संसर्गाला रोखण्यासाठी सामाजिक अंतर ठेवणे अत्यंत गरजेचे आहे. या पार्श्वभूमीवर सर्वांनी महात्मा ज्योतिराव फुले यांची जयंती घरातच राहून अत्यंत साधेपणाने साजरी करावी. व आपापल्या परिसरातील शाळकरी मुलांना महात्मा फुलेंचे विचार पटवून द्यावे. त्यांचे कार्य सांगावे. असे आवाहन श्री. संत सावता माळी युवक संघ महाराष्ट्र राज्य जळगाव महानगर संपर्क प्रमुख चेतन पाटील यांनी केले आहे.
थोर समाज सुधारक क्रांतीसुर्य महात्मा ज्योतिराव फुले व क्रांतीसुर्य सावित्रीबाई फुले यांनी स्त्री शिक्षणाबरोबरच सामाजिक आरोग्यालाही अत्यंत महत्त्व दिले आहे. तत्कालीन काळामध्ये पुण्यात प्लेगच्या साथीमुळे नागरीकांचे आरोग्य धोक्यात आलेल्या असताना त्याप्रसंगी फुले दाम्पत्याने जीविताचा कोणताही विचार न करता जनतेची सेवा केली. त्यांचे कार्य आज आपण कोरोना महामारीशी लढण्यासाठी प्रेरणादायी आणि आदर्श मानावे. ज्या थोर महापुरुषांनी आपल्यावर समाज रक्षणाचे संस्कार घालून दिले. त्याच महापुरुषांच्या जयंतीनिमित्त आपण त्यांचे विचार अमलात आणण्याची गरज आहे. महात्मा ज्योतिराव फुले यांची जयंती घरातच व आपल्या कुटुंबीयांसमवेत राहून साधेपणाने साजरी करावी. तसेच सॅनिटायर, सोशल डिस्टंसिंग आणि कोरोना लसीकरण अत्यंत काटेकोरपणे करून घेतले पाहिजे.
श्री. संत सावता माळी युवक संघ महाराष्ट्र राज्य संस्थापक अध्यक्ष सचिन भाऊ गुलदगड, प्रदेश अध्यक्ष जितेंद्र महाजन, जिल्हाध्यक्ष महेंद्र महाजन, उपाध्यक्ष अल्केश महाजन व सर्व पदाधिकारी यांच्यावतीने आवाहन करण्यात येत असल्याचे प्रतिपादन चेतन पाटील यांनी केले.
