जळगाव (प्रतिनिधी) बहिणाबाई चौधरी मेमोरियल ट्रस्टतर्फे जळगाव येथील चौधरी वाड्यातील बहिणाई स्मृती संग्रहालयात बहिणाबाई चौधरी यांच्या १४१ व्या जयंतीच्या औचित्याने छोटेखानी कार्यक्रम साजरा झाला. सुप्रसिद्ध गायिका सौ. प्रमिला दातार यांनी ‘अरे संसार संसार…’ हे ऑनलाईन गीत सादर केले. यावेळी साहित्यिक ज्ञानेश्वर शेंडे, विजय जैन, किशोर कुळकर्णी, अशोक चौधरी यांनी मनोगत व्यक्त केले.
कौटुंबिक वातावरणात संपन्न झालेल्या या कार्यक्रमात कवयित्री बहिणाबाई चौधरी ट्रस्टच्या स्थापनेमागील डॉ. भवरलाल जैन यांची भूमिका साहित्यिक ज्ञानेश्वर शेंडे यांनी विशद केली. ‘जे तुला विकत घेता येत नाही, ते तुला कमवावे लागेल.’ या दृष्टिकोनामागील कवयित्री बहिणाबाईंचा संस्कार त्यांनी दृष्टांत दाखल्यासह मांडला. ठाणे येथील बहिणाबाई चौधरी साहित्याच्या अभ्यासक सौ. मनिषा कोल्हे यांनीही बहिणाबाईंप्रती कृतज्ञता व्यक्त करून भावस्पर्शी सादरीकरण केले.
बहिणाबाई चौधरी मेमोरियल ट्रस्टचे विश्वस्त दिनानाथ चौधरी, नातसून पद्माबाई चौधरी यांच्यासह उपस्थितांच्याहस्ते बहिणाईंच्या प्रतिमा पूजन करण्यात आले. प्रमुख अतिथींना ट्रस्टद्वारा निर्मित अतुल पेठे दिग्दर्शीत बहिणाई डिव्हीडी सप्रेम भेट देण्यात आली. या प्रसंगी बहिणाबाई चौधरी यांच्या पणतीसून स्मिता चौधरी, शोभाबाई चौधरी, वैशाली चौधरी, हितेंद्र चौधरी, कैलास चौधरी, सविता चौधरी उपस्थित होते. बहिणाईंच्या परिवारातील सदस्य, चौधरी वाड्यातील सदस्यांच्या उपस्थितीत हा कार्यक्रम झाला. दरम्यान कार्यक्रमाप्रसंगी कोरोना संदर्भातील सर्व नियमांचे पालन करण्यात आले. यशस्वीतेसाठी चौधरी वाड्यातील बहिणाबाईंच्या नातेवाईकांसह अशोक चौधरी, देवेश चौधरी, देवेंद्र पाटील, तुषार हरिमकर यांनी सहकार्य केले.
बहिणाई स्मृती संग्रहालयाची वैशिष्ट्ये
जैन इरिगेशनचे संस्थापक भवरलालजी जैन यांच्या संकल्पनेतून जळगावच्या चौधरी वाड्यातील बहिणाबाईंच्या घराचे रूपांतर संग्रहालयात झालेले आहे. भवरलाल अॅण्ड कांताबाई जैन फाउंडेशनच्या सौजन्याने बहिणाबाई चौधरी मेमोरियल ट्रस्टचे अध्यक्ष अशोक जैन यांच्या मार्गदर्शनाखाली संस्थेची वाटचाल सुरू आहे. बहिणाबाई चौधरी यांच्या रोजच्या वापरातील शेतीची अवजारं, स्वयंपाकाच्या वस्तू, भांडी, पुजेचं साहित्य ह्यांची जपवणूक केली आहे. हा अलौकिक ठेवा पुढील पिढीला पाहता येत आहे. ‘अरे संसार संसार’ म्हणत संसारातील सुख दुःखांच्या साक्षीदार असलेल्या अनेक गोष्टी या संग्रहालयात बघायला मिळतात.
