धरणगाव (प्रतिनिधी) एकशे सहा वर्षाची उज्ज्वल परंपरा असलेल्या महाराष्ट्रातील नामवंत शतकोत्तरी पी. आर. हायस्कूलमध्ये गेल्या महिन्यापासून इयत्ता नववी व दहावीच्या नियमित तासिका सुरू झालेल्या असून संपूर्ण परिसर एक दिवसाआड सॅनिटायझराईज केला जात आहे. शाळेच्या प्रवेशद्वाराजवळच प्रत्येक विद्यार्थ्याची थर्मल पॉवर गन, आॅक्सीमिटर द्वारे तपासणी करत आहेत. हातावर सॅनिटायर मारुनच विद्यार्थ्यांना प्रवेश दिला जात आहे.
यासाठी धरणगाव नगरपालिकेचे लोकनियुक्त नगराध्यक्ष निलेश चौधरी यांनी शाळेसाठी मशिनरी उपलब्ध करून दिली आहे. तर ग. स. बॅंकेचे अध्यक्ष मनोज पाटील यांनी दोन फुट सॅनिटायझर मशिन भेट म्हणून दिल्याने त्याचा लाभ विद्यार्थी घेत आहेत. सर्वच शिक्षकांची आरटीपीसीआर कोविड टेस्ट झालेली आहे. प्रत्येक वर्ग सॅनिटायझर द्वारे निर्जतुकीकरण करण्यात येत आहेत. प्रत्येक बेंचवर एक विद्यार्थी बसवले आहेत. मुख्याध्यापक डॉ. संजीवकुमार सोनवणे यांच्या सोबतच उपमुख्याध्यापक आर. के. सपकाळे, पर्यवेक्षिका आशा शिरसाठ आणि सर्वच शिक्षक- शिक्षकेतर कर्मचारी विद्यार्थ्यांची काळजी घेत आहेत. यामुळे दिवसेंदिवस विद्यार्थी संख्या वाढत असून नववी व दहावीच्या ५५५ विद्यार्थ्यांपैकी ४०० वर विद्यार्थी शाळेत नियमित येत आहेत. जिल्हा परिषदेचे उपशिक्षणाधिकारी सतीश चौधरी, धरणगावचे गटशिक्षणाधिकारी अशोक बिऱ्हाडे आणि केंद्रप्रमुख आर. एस. पाटील यांनी नियमित भेट देऊन शाळेच्या कामकाजाविषयी समाधान व्यक्त केले आहे.
