चाळीसगाव (प्रतिनिधी) चाळीसगाव- नांदगाव रस्त्यावरील रोहिणी ते तळेगाव भरधाव वेगाने धावणाऱ्या स्विफ्ट डिझायरने समोरून येणाऱ्या मोटारसायकलला जोरदार धडक दिल्याची घटना आज दुपारी २ वाजेच्या सुमारास घडली. या भीषण अपघातात दुचाकीवरील चौघांचा मृत्यू झाला. या अपघातात दोन वर्षाचा मुलगा व कार चालकही गंभीर जखमी झाले असून त्यांच्यावर खाजगी रुग्णालयात उपचार सुरु आहेत.
याबाबत अधिक माहिती अशी की, नांदगावकडून चाळीसगावकडे भरधाव वेगात येत असलेले मारुती कंपनीची स्विफ्ट डिझायर क्रमांक एम. एच. ०२ डी. जे. ने समोरून येणाऱ्या मोटर सायकल क्रमांक एम.एच. ०२ ई.डी. ६४७६ ला समोरून जोरदार धडक दिल्याने हा अपघात झाला. अपघातात मोटरसायकलचा पूर्णपणे चेंदामेंदा झाला, तर स्विफ्ट कारचे देखील मोठ्या प्रमाणावर नुकसान झालं आहे.
अपघातात मोटारसायकलवरून सालदार विलास मोरे व त्याच्या परिवाराला त्याच्या मूळ गावी तांदुळवाडी येथे सोडवण्यासाठी गाडी जात होती. त्यांच्यासोबत भगवान नागराज पाटील (वय ३६) वाघडू, सालदार विलास वसंत मोरे (वय ४०) त्याची पत्नी कल्पना मोरे (वय ३६) मुलगी रेणुका (वय ३) हेही होते. या सर्वांचा जागीच मृत्यू झाला. तर २ वर्षांचा चिमूरडा अमोल मोरे या अपघातात जखमी झाला. त्याला अधिक उपचारासाठी धुळे येथील शासकीय रुग्णालयात हलविण्यात आलं आहे.
