नाशिक (वृत्तसंस्था) शासकीय योजनेचा माध्यमातून पातोंडा (ता. चाळीसगाव) येथे समूह परिसरात क्लस्टर विकसित कामाची अतिरिक्त सुरक्षा अनामत रक्कम ३५ लाख रुपये मिळवून देण्याच्या मोबदल्यात चार लाखांची लाच स्वीकारताना चाळीसगाव येथील उपविभागीय अभियंत्याला शनिवारी रात्री नाशिकमध्ये अटक करण्यात आली. ज्ञानेश्वर पंढरीनाथ विसपुते (वय ५७, पद- उपविभागीय अभियंता, बांधकाम उपविभाग चाळीसगाव, वर्ग-१, ता. चाळीसगाव, जि. जळगाव, रा. अशोकनगर, धुळे) असे लाचखोर अधिकाऱ्याचे नाव आहे. दरम्यान, नाशिकसह त्यांच्या धुळ्यातील घरी पथकांकडून झडती सुरू होती.
तक्रारदार हे ठेकेदार असून, त्यांनी डॉ. शामाप्रसाद मुखर्जी रुरचन” या शासकीय योजनेचा माध्यमातून पातोंडा (ता. चाळीसगाव) येथे जळगाव जिल्हा परिषदेच्या बांधकाम उपविभागातून समूह परिसरात क्लस्टर विकसित करण्याचे काम घेतले होते. या कामाच्या बिलाची चार कोटी ८२ लाख रुपये रक्कम काढून दिल्याचा मोबदल्यात तसेच कामाचे अतिरिक्त सुरक्षा अनामत रक्कम ३५ लाख रुपये मिळवून देण्याचे मोबदल्यात लाचखोर विसपुते याने ५ लाख रुपयांच्या लाचेची मागणी शनिवारी केली. तडजोडीअंती ४ लाख देण्याचे ठरले.
परंतू लाच देण्याची इच्छा नसल्यामुळे तक्रारदार ठेकेदारने लाचलुचपत प्रतिबंधक विभागाकडे तक्रार केली. लाचेच्या मागणीची पडताळणी केल्यानंतर पथकाने सापळा रचला. लाचखोर विसपुते याने शहरातील गडकरी चौक परिसरात ४ लाख रुपये लाचेची रक्कम स्वीकारात पथकाने विसपुतेला रंगेहाथ पकडत अटक केली. ही कारवाई पोलिस अधीक्षक शर्मिष्ठा घारगे वालावलकर, उपअधीक्षक नरेंद्र पवार यांच्या मार्गदर्शनाखाली पोलिस निरीक्षक स्वप्निल राजपूत, प्रभाकर गवळी, संदीप हांडगे, किरण धुळे, अविनाश पवार, सुरेश चव्हाण यांनी केली.
