चोपडा (प्रतिनिधी) तालुक्यातील आदिवासी भागातील मुळ्यावतार गावानजीक असणाऱ्या पिंपरपाडा या पाड्यातील एका आदिवासी मुलाचा १८ रोजी सर्पदंश झाल्याने दुर्दैवी मृत्यू झाल्याची दुःखद घटना सकाळी घडली. लखीराम सीताराम बारेला (वय १६), असे मृत बालकाचे नाव आहे.
लखीराम हा सकाळी झोपेतून उठून लघुशंकेसाठी घराबाहेर आला. त्याच वेळी कोब्रा जातीच्या विषारी सापाने त्याला दंश केला. यानंतर थोड्याच वेळात प्रकृती बिघडल्याने त्याला चोपडा येथील उपजिल्हा रुग्णालयात उपचारार्थ नेण्यात आले. तेथे डॉक्टरांनी तपासणी केल्यानंतर लखीरामला मृत घोषित केले. या प्रकरणी चोपडा पोलिस ठाण्यात नोंद झाली आहे. शवविच्छेदन डॉ. सागर पाटील यांनी केले. या वेळी डॉ. चंद्रकांत बारेला उपस्थित होते. मृत लखीराम हा हिंगणवाडे आश्रमशाळेत आठवीत शिकत होता. त्याच्या पश्चात वडील, भाऊ, दोन बहिणी असा परिवार आहे.
