लातूर (वृत्तसंस्था) उदगीर तालुक्यातील कुमठा खु. शिवारात शनिवारी (दि. १३) सकाळी साडे अकरा वाजेच्या सुमारास एका १५ वर्षीय शाळकरी मुलाचा मृतदेह आढळून आला होता. अंदाजे चार दिवसांपूर्वी त्याचा खून झाल्याचा अंदाज पोलिसांनी वर्तविला. खून इतका निर्घृण करण्यात आला की, मयताचा एक पाय तोडून व चेहऱ्यावरचे कातडे सोलून टाकण्यात आले आहे. संतोष गोविंद घुगे (वय १५, रा. कुमठा खु. ता. उदगीर) असे मयताचे नाव आहे.
कुमठा खु. गावाच्या पश्चिमेस कुमठा-हेर रस्त्याच्या अंदाजे दोनशे मीटरच्या आत चंद्रभान केंद्रे व अनिल केंद्रे यांच्या सामाईक शेत नालीत मेंढपाळ बालाजी कुमदाळे हा मेंढ्या चारत होता. त्यावेळी त्याला एक प्रेत आढळून आले. याची माहिती पोलिसांना देण्यात आली. थोड्याच वेळात पोलिसांनी मृताची ओळख व मारेकऱ्याच्या शोधासाठी श्वान पथक व फॉरेन्सिक लॅबला पाचारण करण्यात आले होते. श्वान पथक येण्यापूर्वीच उदगीरचे उपविभागीय पोलीस अधिकारी दिलीप भागवत व उदगीर ग्रामीण पोलीस ठाण्याचे पोलीस निरीक्षक अरविंद पवार यांनी एक तासाच्या आत संशयित मारेकऱ्याचा शोध लावून त्याच्याकडूनच मयताची ओळख पटवून घेतली.
शाळकरी मुलगा संतोष नववीच्या वर्गात शिक्षण घेत होता. त्याचा खून करण ज्ञानोबा देवनाळे (वय २८ रा. पिंपरी ता. उदगीर) याने केला आहे. तो प्रेतापासून जवळच असलेल्या माधवराव केंद्रे यांचा सालगडी आहे. त्यास संशयित आरोपी म्हणून पोलिसांनी ताब्यात घेतले आहे. हा खून अंदाजे चार दिवसांपूर्वी करण्यात आल्याचा अंदाज पोलिसांनी वर्तविला आहे. मयताचा एक पाय तोडून फेकण्यात आला आहे. चेहऱ्यावरचे कातडे सोलून टाकले होते. यामुळे प्रेताची ओळख पटणे अवघड झाले होते. घटना उघडकीस आल्यानंतर पोलिसांनी एका तासात मारेकऱ्याचा शोध लावला आणि हा खून मोबाईल चोरीच्या संशयावरुन करण्यात आल्याचेही चौकशीत उघड झाले.
याप्रकरणी याप्रकरणी गोविंद तुकाराम घुगे (वय ३८ वर्षे, व्यवसाय – चालक रा. कुमठा, ता. उदगीर) याच्यावर उदगीर ग्रामीण पोलीस ठाण्यात गु.र.नं. २८/२०२४ कलम ३०२, २०१ भादवि प्रमाणे गुन्हा नोंद करण्यात आला आहे. तपासासाठी सहायक पोलीस उपनिरीक्षक सुमेध बनसोडे, रवींद्र तारु, तुकाराम चेरले, पोलीस नायक नाना शिंदे, व्यंकट शिरसे यांनी सहकार्य केले. उपविभागीय पोलीस अधिकारी दिलीप भागवत यांच्या मार्गदर्शनाखाली पोलीस निरीक्षक अरविंद पवार हे पुढील तपास करीत आहेत.
