चाळीसगाव (प्रतिनिधी) तालुक्यातील अवजड वाहनांसाठी बंद असलेल्या कन्नड घाटात महाराष्ट्र पोलीस ट्रक चालकांकडून कशा प्रकारे पैसे घेतात याबाबत आमदार मंगेश चव्हाण यांनी वेषांतर करून स्टिंग ऑपरेशन केले होते. या स्टिंग ऑपरेशन नंतर आज त्यांनी पोलीस अधीक्षक डॉ. प्रवीण मुंडे यांची भेट घेत दोषी पोलिसांवर कारवाईची मागणी केली. तसेच चाळीसगाव तालुक्यातील अवैध धंद्यांचे बाबतीतही तक्रार केली आहे.
आमदार मंगेशदादा चव्हाण यांनी वेषांतर करत स्टिंग ऑपरेशन करत चाळीसगाव ग्रामीण पोलिसांचा वसुलीचा प्रकार उघड केल्यानंतर जिल्ह्यासह संपूर्ण राज्यात एकच खळबळ उडाली आहे. दरम्यान यानंतर आमदार मंगेश चव्हाण यांनी पोलीस अधीक्षकांची भेट घेत संपूर्ण घटनाक्रमाची सविस्तर माहिती दिली तसेच दोषींवर कारवाई करण्याची मागणी केली यासह तालुक्यातील अवैध धंद्या बाबतही चव्हाण यांनी पोलीस अधीक्षकांकडे नाराजी व्यक्त करत सविस्तर चर्चा करून आपली तक्रार दिली.
काय होते स्टिंग ऑपरेशनमध्ये
आमदार मंगेशदादा चव्हाण यांनी स्वतः अवजड ट्रक चालवत कन्नड घाटात नेला. त्याठिकाणी असलेल्या पोलिसांनी त्यांच्याकडे ५०० रुपयांची मागणी केली. आमदार चव्हाण पोलिसांना थोडे कमी करा अस सांगत ५०० रुपये पोलिसांच्या हातात दिले व बाकी पैसे परत मागितले असता सदर पोलिसाने ते देण्यास नकार दिला. नंतर ड्रायव्हर बनलेले आमदार मंगेश चव्हाण यांनी बाजूला उभ्या असलेल्या पोलिसांना जवळ बोलावले व हा बाकी पैसे परत देत नसल्याचे सांगितले. तेव्हा त्यातील एक पोलीस शिवीगाळ करायला लागला. मात्र, आमदार मंगेश चव्हाण यांनी खाली उतरून पोलिसांशी बोलायला सुरुवात करताच काही पोलिसांनी आमदारांना ओळखले व त्यांनी पळ काढला होता.
