पुणे (वृत्तसंस्था) कोरोना रुग्णांच्या दिवसेंदिवस झपाट्याने वाढणाऱ्या संख्येमुळे पुण्यातील आरोग्ययंत्रणा जवळपास कोलमडली आहे. जिल्ह्यात ऑक्सिजन, रेमडेसिविर इंजेक्शन्स आणि बेडसचा प्रचंड तुटवडा जाणवत आहे. या वातावरणामुळे पुण्यातील नागरिकांच्या मनावर नकरात्मक परिणाम होत आहे. भीती आणि शंका दूर करण्यासाठी नागरिकांच्या मदतीसाठी असलेल्या कंट्रोल रुममध्ये दिवसाला ९ ते १० हजार पुणेकर फोन करत आहेत.
पुण्यातील कंट्रोल रुममध्ये दररोज घाबरलेल्या नागरिकांचे फोन येत आहेत. गेल्या काही दिवसांमध्ये या फोन कॉल्सची संख्या कमालीची वाढली आहे. आम्ही दिवसाला ९ ते १० हजार लोकांशी बोलत आहोत. यापैकी बहुतांश फोन कॉल्स हे कोरोनासंबंधीच्या समस्यांशी निगडीत असतात. लोकांमध्ये आता कोरोनाची प्रचंड दहशत पसरली आहे, अशी माहिती पुण्यातील कंट्रोल रूमच्या व्यवस्थापकांकडून देण्यात आली.
पुणे शहरात मंगळवारी दिवसभरात ५ हजार १३८ जणांची कोरोना चाचणी पॉझिटिव्ह आली आहे. तर ६ हजार ८०२ जण कोरोनामुक्त झाले आहेत. पुण्यात दिवसभरात ५५ जणांचा कोरोनामुळे मृत्यू झालाय. सध्या ५२ हजार ९७७ रुग्णांवर उपचार सुरु असून त्यातील १ हजार २७७ जणांची प्रकृती गंभीर आहे.
कालच्या आकडेवारीनुसार पुण्यातील एकूण कोरोना रुग्णांची संख्या ३ लाख ७६ हजार ९६२ वर जाऊन पोहोचली आहे. त्यातील ३ लाख १७ हजार ७६७ जण पूर्णपणे बरे होऊन घरी परतले आहेत. तर आतापर्यंत ६ हजार २१८ जणांचा कोरोनामुळे मृत्यू झाला आहे.
