वॉशिंग्टन (वृत्तसंस्था) एका तीन वर्षीय चिमुकल्याचं खेळणं आईच्या जीवावर बेतलं असून तिचा जागीच मृत्यू झाला आहे. तीन वर्षीय मुलगा खऱ्याखुऱ्या बंदुकीसोबत खेळत (plying with real gun) होता. यावेळी बंदुकीतून अचानक गोळी सुटल्यानं संबंधित महिला रक्ताच्या थारोळ्यात पडली होती. दरम्यान, डॉक्टरांनी त्यांना मृत घोषित केलं आहे.
मीडिया रिपोर्टनुसार, संबंधित घटना अमेरिकेतील शिकागो शहरात घडली आहे. येथील एक तीन वर्षीय मुलगा कारच्या मागील सीटवर बसून वडिलांच्या खऱ्याखुऱ्या बंदुकीसोबत खेळत होता. यावेळी हे कुटुंब एका सुपरमार्केटच्या पार्किंगमध्ये होतं. दरम्यान मुलानं बंदुकीचा ट्रीगर दाबल्याने बंदुकीतून सुटलेली गोळी थेट आईच्या मानेवर मागच्या बाजुला लागली आहे. ही दुर्घटना इतकी भयावह होती की, आई जागीच रक्ताच्या थारोळ्यात पडली. ही घटना 12 मार्च रोजी सायंकाळच्या सुमारास घडली आहे. याबाबत पोलिसांनी देखील दुजोरा दिला आहे.
चिमुकल्याकडून बंदुकीचा ट्रिगर दाबला गेला अन्
देजाह बेनेट असं मृत पावलेल्या 22 वर्षीय आईचं नाव आहे. पोलिसांनी दिलेल्या माहितीनुसार, घटनेच्या दिवशी शनिवारी देजाह या आपला पती आणि तीन वर्षीय चिमुकल्यासोबत सुपरमार्केटमध्ये शॉपिंग करायला गेले होते. दरम्यान, हे कुटुंब सुपर मार्केटच्या पार्किंगमध्ये कारमध्ये बसलं होतं. यावेळी मागच्या सीटवर त्यांचा तीन वर्षाचा मुलगा बंदुकीसोबत खेळत होता. यावेळी अचानक चिमुकल्याकडून बंदुकीचा ट्रिगर दाबला गेला आणि क्षणात होत्याच नव्हतं झालं.
22 वर्षीय आई देजाह बेनेट यांच्या मानेच्या मागच्या बाजुला गोळी लागल्यानं त्या रक्ताच्या थारोळ्यात पडल्या. यावेळी बाजुलाच बसलेल्या पतीने त्यांना त्वरित शिकागो येथील रुग्णलयात दाखल केलं. पण वैद्यकीय अधिकाऱ्यांनी प्राथमिक तपासणी करत देजाह यांना मृत घोषित केलं आहे. पोलिसांना या घटनेची माहिती मिळताच पोलिसांनी घटनास्थळी दाखल होतं. मृत महिलेच्या पतीला ताब्यात घेतलं आहे. त्याची कसून चौकशी केली जात आहे.
