जळगाव (प्रतिनिधी) केंद्रीय मंत्री रावसाहेब दानवे (Raosaheb Danve) यांनी महाविकास आघाडीतील अनेक आमदार नाराज असून ते आपल्या संपर्कात असल्याचा दावा केला. दानवेंच्या याच वक्तव्यावर राष्ट्रवादी काँग्रेसचे (NCP) नेते एकनाथराव खडसे (Eknath Khadse) यांनी टोला लगावला आहे. तर, अनेक आमदार संपर्कात असल्याचं रावसाहेब दानवे यांचं वक्तव्य हे केवळ मनोरंजन असून दानवे स्वप्न पाहत आहेत, असा टोला त्यांनी लगावला.
मुक्ताईनगर येथील निवासस्थानी राष्ट्रवादीचे नेते एकनाथराव खडसे यांनी पत्रकारांशी संवाद साधला. भाजपचे अनेक नेते वेगवेगळे भविष्य वर्तवतात. चंद्रकांत पाटील यांनी देखील अनेक वेळा वेगवेगळ्या तारखा दिल्या आहेत. मात्र सर्व तारखा निघून गेल्या असून चंद्रकांत पाटलांच्या नवीन तारखेची आम्ही वाट पाहत आहोत, अशी खोचक टीका राष्ट्रवादीचे ज्येष्ठ नेते एकनाथ खडसे यांनी केली आहे.
मनसेपासून ते एमआयएमपर्यंत सर्व राजकीय पक्ष कार्यकर्त्यांचा आत्मविश्वास वाढवण्यासाठी आगामी काळात आपणच सत्तेत येणार असल्याचे वक्तव्य करतात. तसेच चंद्रकांत पाटील व रावसाहेब दानवे हे देखील आपल्या कार्यकर्त्यांचे मनोबल वाढवण्यासाठी आम्ही सत्तेवर येणार असल्याचे चित्र रंगवत आहेत. ज्यावेळी निवडणुका जाहीर होतील, त्यावेळी वस्तुस्थिती समोर येईल. आत्ताच अंदाज व्यक्त करणं अवघड आहे,’ असं खडसे म्हणाले.
दरम्यान, प्रवीण दरेकर यांच्या गुन्ह्याची चौकशी सुरू आहे. त्याबाबतच्या कारवाईला तात्पुरती स्थगिती मिळाली आहे. मात्र, ही फाइल कायमची बंद झाली असा त्याचा अर्थ होत नाही. या प्रकरणात चौकशी अंती जे तथ्य समोर येईल त्यावरून जी कार्यवाही व्हायची ती होईल, असे मतही खडसे यांनी व्यक्त केले आहे.
