पाळधी, ता. धरणगाव (प्रतिनिधी) – एरंडोल तालुक्यातील सावदे येथील सरपंचांच्या बंद घरात मध्यरात्रीच्या सुमारास झालेल्या धाडसी घरफोडीत ५५ हजार रुपये रोख व दागिने चोरट्यांनी चोरुन पलायन केल्याने खळबळ उडाली आहे.
येथून जवळच असलेल्या एरंडोल तालुक्यातील सावदे येथील सरपंच गोपाल पवार हे कुटुंबीयांसह आपल्या घराला कुलूप लाऊन राजस्थान येथील खाटू श्यामच्या दर्शनासाठी गेले होते. नेमकी हीच संधी चोरट्यांनी साधून मध्यरात्री त्यांचा घराचे कुलूप तोडून आत प्रवेश केला. त्यानंतर चोरट्यांनी कपाट उघडून त्यातील ५५ हजारांची रोकड व दागिने घेऊन पोबारा केला. चोरट्यांनी घरातील देवी, देवतांच्या मूर्तीही सोबत नेल्याची चर्चा आहे. ही घटना आज सकाळी ६ वाजेच्या सुमारास त्यांच्या घराशेजारी राहणाऱ्या त्यांच्या काकू मुक्ताबाई पवार यांच्या लक्षात आली. त्यांनी लगेच गोपाल पवार यांचे बंधू शरद पवार यांना ही माहिती दिली. त्यांनी नातेवाईकांसह घटनास्थळी धाव घेत पाळधी पोलिसांना माहिती कळवली. पोलिसांनी तत्काळ घटनास्थळ गाटत सर्व माहिती घेत पंचनामा केला. या वेळी जळगाव येथून श्वान पथक मागवले होते. त्यातील चॅम्प नावाचे श्वानाने घरामागील गल्लीपर्यंत मार्ग दाखवला. तर, फिंगर प्रिंट पथकानेही घरातील ठशांची पाहणी केली. दरम्यान, गोपाल पवार हे बाहेरगावी असल्याने नेमका काय ऐवज चोरीला गेला, हे ते आल्यावरच स्पष्ट होणार आहे. तर काहि लाखाच्या घरात ही चोरी असल्याची गावात चर्चा सुरू होती. गावात प्रथमच मोठी घरफोडी झाल्याने खळबळ उडाली आहे. तर, गोपाल पवार यांना ही माहिती मिळताच ते परतीच्या प्रवासाला लागले आहे. याबाबत त्यांचे भाऊ शरद काशिनाथ पवार यांच्या फिर्यादीनुसार पाळधी पोलिसतिं गुन्हा दाखल करण्याचे काम सुरू होते. तपास पाळधी पोलीस करत आहेत. दरम्यान, पाळधी पोलीस चौकीचे स.पो.नि. भूषण कोते यांनी चोरीचा नेमका आकडा गोपाल पवार आल्यानंतरच समजेल, असे स्पष्ट केले.
