गोंदिया (वृत्तसंस्था) अर्जुनी मोरगाव तालुक्यातील चान्ना बाक्टी येथे दारूच्या आहारी गेलेल्या बापलेकाचा एकाच रात्री मृत्यू झाला. गणराज आत्माराम वरखडे (६५), पुरुषोत्तम वरकडे (३५) असे मृतकांची नावे आहे.
गणराज व त्याचा मुलगा पुरुषोत्तम हे दारूच्या आहारी गेले होते. पती व मुलाच्या व्यसनाला कंटाळून गणराजची पत्नी माहेरी निघून गेली होती, तर मोठा मुलगा किशोर (४०) कामानिमित्त बाहेरगावी होता. गणराज व पुरुषोत्तम दोघेच घरी राहत होते.. ते गावातील अवैध दारू अड्डयावर दारू गाळण्याचे काम करायचे. त्याना दारूचे व्यसन होते.
तीन दिवसांपासून पुरुषोत्तमची प्रकृती खालावली होती. सोमवारी (२४ जुलै) बापलेक दारू पिऊन झोपी गेले. यातच रात्री ९ वाजताच्या सुमारास पुरुषोत्तमचा तर मंगळवारी (२५ जुलै) पहाटे गणराजचा मृत्यू झाला. चान्ना बाक्टी येथे शंभर घरांत मोहफुलाची दारू काढण्याचा अवैध व्यवसाय सुरू आहे. अवैध दारू व्यवसायामुळे अनेक कुटुंब उद्ध्वस्त झाली आहेत. यातच बापलेकाचा दारूच्या नशेत एकाच रात्री मृत्यू झाल्याने गावात संतापाची लाट उसळली आहे. अवैध दारूविक्रेत्यांवर तातडीने कठोर कारवाई करावी, अशी मागणी गावकऱ्यांनी कडून होत आहे.
