जामनेर (प्रतिनिधी) येथील तहसील कार्यालयातील पुरवठा निरीक्षकाकडे दीड लाखांची खंडणी मागून मारण्याची धमकी दिल्याचा धक्कादायक प्रकार घडला आहे. याप्रकरणी जामनेर पोलीस स्थानकात रविंद्र सिताराम पवार (रा. शेदुर्णी) व दिपक गायकवाड (रा. वाकोद ता. जामनेर) यांच्याविरुद्ध गुन्हा दाखल करण्यात आला आहे.
यासंदर्भात विठ्ठल मच्छिंद्रनाथ काकडे (वय ४१ रा. मुक्काम धामगाव देवीचे ता. पाथर्डी जिल्हा अहमदनगर ह.मु. वाकी रोड पारिजात कॉलनी) यांनी दिलेल्या फिर्यादीनुसार, दि. २७ मे २०२२ रोजी सकाळी ११ वाजेच्या सुमरास जामनेर शहरात तहसील कार्यालयाच्या आवारात रविंद्र सिताराम पवार (रा. शेदुर्णी) व दिपक गायकवाड (रा. वाकोद ता. जामनेर) यांनी तुम्ही रेशनचा काळा बाजार केलेला आहे. मला १,५०,००० रुपये द्या नाहीतर मी तुमची व्हीडीओ क्लीप व्हायरल करीन व तुमची बदनामी करुन तुम्हाला निलंबित करेल. तसेच तुमचे प्रमोशन होऊ देणार नाही, अशा प्रकारे विठ्ठल काकडे यांच्या मनात भिती घालवून खंडणीची मागणी केली. यावर विठ्ठल काकडे त्यांना म्हणाले कि, मी कोणतेही चुकीचे काम केलेले नाही, मी पैसे देणार नाही. यावेळी दोघांना काकडे यांच्या खिशातील मोबाईल असल्याचा संशय आल्याने मी रेकार्डींग करीत आहे, असे त्यांना वाटले. तेव्हा दोघांनी काकडे यांचा मोबाईल घेत चेक केला आणि तुम्ही माझी रेकार्डींग करीत आहे का?. मी तुम्हाला बघून घेईल तुम्हाला घरी येत मारीन, अशी धमकी दिली. याप्रकरणी जामनेर पोलीस स्थानकात दोघांविरुद्ध गुन्हा दाखल करण्यात आला असून पुढील तपास पोलीस उपनिरीक्षक किशोर पाटील हे करीत आहेत.
