धरणगाव (प्रतिनिधी) तालुक्यातील बांभोरी बुद्रुक येथील कानबाईच्या मातेच्या विसर्जन मिरवणुकीत सोमवारी एका युवकाचा विहिरीत पडल्याने मृत्यू झाला. त्यामुळे या विसर्जन मिरवणुकीच्या आनंदावर विरजण पडले.
बांभोरी बुद्रुक येथील मयूर राजेंद्र पाटील (२३) हा गावातील विहिरीत कानुबाई मातेच्या मूर्तीचे विसर्जन करत असताना विसर्जन मिरवणुकीत सामील झाला होता. तो विहिरीत खाली डोकावून पाहत होता. त्याचवेळी त्याचा पाय सरकल्याने तो विहिरीच्या पाण्यात पडला. लोकांनी त्यास विहिरीतून त्वरित बाहेर काढले. पुढील उपचाराकरिता धरणगाव ग्रामीण रुग्णालयात आणण्यात आले, त्याठिकाणी त्याला मृत घोषित करण्यात आले. याप्रकरणी सुधाकर नथू पाटील यांच्या फिर्यादीवरून अकस्मात मृत्यूची नोंद करण्यात आली आहे. पुढील तपास पो.नि. पवन देसले यांच्या मार्गदर्शनाखाली हवालदार प्रमोद पाटील हे करीत आहेत.
