धरणगाव (प्रतिनिधी) राज्य उत्पादन शुल्क विभागाच्या भरारी पथकाने गजानन पार्क परिसरात छापा टाकून बनावट देशी दारूचा कारखाना उध्वस्त केल्यानंतर आता या बनावट मद्याच्या तस्करीचे धागेदोरे धुळ्यापर्यंत जाऊन पोहचले आहेत. एवढेच नव्हे तर बनावट मद्यार्क पुरवणारे व तयार बनावट मद्य घेणाऱ्या अज्ञात आरोपींसह धुळ्याचा संशयित फरार असल्याची माहिती देखील उत्पादन शुल्कच्या पथकाने आज न्यायालयात दिली आहे.
बनावट दारू बनवताना पडले रंगेहात
राज्य उत्पादन शुल्क विभागाच्या भरारी पथकाने धाड टाकली तेव्हा संशयित आरोपी मद्यार्कापासुन बनावट देशी मद्य बनवताना व ते देशी दारु टँगो पंचच्या १८० मि.ली. व ९० मि.ली. भरताना मिळून आले होते. आरोपींच्या ताब्यातून मोठ्या प्रमाणात देशी दारु टँगो पंचच्या बाटल्या, जीवंत पत्री बुचे, कागदी लेबल, बाटल्या सीलबंद करण्याचे ४ मशीन, वाहने वरील क्र. १० मध्ये नमुद असलेला एकुण ११ लाख २ हजार ४०० रुपयाचा मुद्देमाल जप्त करण्यात आला होता.
मद्य निर्मितीसाठीचे साहित्य कोठून आणले याची होणार कसून चौकशी
बनावट मद्य निर्मितीकरता लागणारे सर्व साहित्य आरोपींनी कोठून आणले. याबाबत राज्य उत्पादन शुल्क विभागाच्या भरारी पथक आता कसून तपास करणार आहे. तसेच बनावट मद्य तयार करून आणखी इतरत्र कोठे लपवून ठेवले आहे का?, बनावट देशी मद्य तयार करून ते कोणाला पुरविण्यात येणार होते?. याबाबत देखील अटकेतील संशयितांकडून चौकशी केली जाणार आहे.
बनावट मद्यार्क पुरवणारे व तयार बनावट मद्य घेणाऱ्या अज्ञात आरोपींसह धुळ्याचा संशयित फरार
राज्य उत्पादन शुल्क विभागाच्या भरारी पथकाने न्यायालयात दिलेल्या माहितीनुसार गजेंद्र रविंद्र सुर्यवंशी, रा. अहिल्यादेवी नगर, प्रताप मीलच्या मागे, धुळे, ता. जि. धुळे हा अटकेतील संशयितांचा साथीदार असल्याचे त्यांनी स्वत : सांगितले आहे. सूर्यवंशी आहा फरार असून त्याच्या अटकेसाठी प्रयत्न सुरु आहेत.
२५ जानेवारी पर्यंत पोलीस कोठडी
राज्य उत्पादन शुल्काच्या पथकाने छापा टाकून १) गौतम नरेंद्र माळी, वय ३२ वर्षे, रा. थवा, ता. नेत्रंग, जि. भरुच, (गुजरात) ह.मु. साईगजानन पार्क, धरणगाव, ता. धरणगाव, जि. जळगाव २) भुपेंद्र गोकुळ पाटील, वय २९ वर्षे, रा. मराठे गल्ली, धरणगाव, ता. धरणगाव, जि. जळगाव ३) कडु राजाराम मराठे, वय ४० वर्षे, रा. मराठे गल्ली, धरणगाव, ता. धरणगाव, जि. जळगाव ४) भास्कर पांडुरंग मराठे, वय ६३ वर्षे, रा. साई गजानन पार्क, धरणगाव, अशा चार जणांना रंगेहाथ अटक केली होती. या सर्वांना आज धरणगाव न्यायालयात हजर केले असता २५ जानेवारी पर्यंत पोलीस कोठडी सुनावण्यात आली आहे.
राज्य उत्पादन शुल्क विभाग जळगावच्या भरारी पथकाने ही कारवाई केली आहे. या संपूर्ण प्रकरणाची कसून चौकशी सुरु झाली आहे. बनावट मद्यार्क पुरवणारे व तयार बनावट मद्य घेणाऱ्या अज्ञात आरोपींचा शोध घेतला जाणार असून धुळ्याच्या आरोपीलाही लवकरच अटक केली जाईल.
– अर्जुन ओहोळ
(विभागीय उपायुक्त, राज्य उत्पादन शुल्क विभाग, नाशिक)
