धरणगाव (प्रतिनिधी) राज्य उत्पादन शुल्क विभागाच्या भरारी पथकाने बनावट मद्य निर्मिती प्रकरणाचा ‘मास्टर माइंड’ गौतम माळीला आज गुजरात पोलिसांनी ताब्यात घेतले आहे. दरम्यान, बनावट मद्य प्रकरणात आंतरराज्यीय टोळीचा सहभाग असल्याचे आधीच शुल्क विभागा तपासात समोर आले होते.
१ फेब्रुवारीपर्यंत न्यायालयीन कोठडीत रवानगी
अटकेतील आरोपींपैकी ‘मास्टर माइंड’ असलेल्या गौतम माळीला (वय ३२ वर्षे, रा. थवा, ता. नेत्रंग, जि. भरुच, (गुजरात) ह.मु. साईगजानन पार्क, धरणगाव, ता. धरणगाव, जि. जळगाव) २५ जानेवारीला पुन्हा तीन दिवसांची म्हणजे २७ जानेवारीपर्यंत पोलीस कोठडी मिळाली होती. त्यानुसार आज धरणगाव न्यायालयात हजर करण्यात आले होते. राज्य उत्पादन शुल्क विभागाच्या भरारी पथकाने गौतम माळीची न्यायालयीन कोठडी मागितली. त्यानुसार त्याची १ फेब्रुवारीपर्यंत न्यायालयीन कोठडीत रवानगी झाली.
डेडीपाडा पोलिसांनी घेतले गौतमला ताब्यात
बनावट मद्य प्रकरणातील ‘मास्टर माइंड’ असलेल्या गौतम माळीचा ताबा घेण्यासाठी मागील चार दिवसापासून धरणगावात गुजरात पोलिसांच्या दोन पथकं ठाण मांडून होते. गौतमवर गुजरातमध्ये वेगवेगळ्या पोलीस ठाण्यात चार गुन्हे आहेत. त्यात डेडीपाडा पोलीस स्थानकात २०१७ मधील एका गुन्ह्याचा तर भरूच जिल्ह्यातील नटरंग पोलीस स्थानकात तब्बल ३ गुन्हे आहेत. न्यायालयाने आज गौतमचा ताबा डेडीपाडा पोलीसांना दिला. त्यानुसार सर्व कायदेशीर प्रक्रिया पार पाडल्यानंतर डेडीपाडा पोलीस ‘मास्टर माइंड’ गौतम घेऊन रवाना झाले. दुसरीकडे नटरंग पोलिसांनी देखील गौतमचा ताबा हवा आहे. त्यामुळे डेडीपाडा पोलिसांची कायदेशीर चौकशी आणि प्रक्रिया पूर्ण झाल्यानंतर गौतमचा ताबा नटरंग पोलिस घेण्याची शक्यता आहे. दरम्यान, जळगाव येथील एका गुन्ह्यात देखील गौतमचा ताब्यासाठी न्यायालयात अर्ज करण्यात आल्याची माहिती समोर आली आहे.
तर उर्वरित भुपेंद्र गोकुळ पाटील (वय २९ वर्षे, रा. मराठे गल्ली, धरणगाव), कडु राजाराम मराठे (वय ४० वर्षे, रा. मराठे गल्ली, धरणगाव), भास्कर पांडुरंग मराठे (वय ६३ वर्षे, रा. साई गजानन पार्क, धरणगाव) या तिघां आरोपींची १ फेब्रुवारीपर्यंत न्यायालयीन कोठडीत रवानगी झाली आहे. दरम्यान, वरील तिघां आरोपींसह सचिन मधुकर पाटील (वय ४२ वर्ष रा. भवानी मंदिराच्या मागे शाम कॉलनी पाळधी ता. धरणगाव) याने देखील जामीन अर्ज दाखल केला होता. परंतू न्यायालयाने चौघांचे जामीन अर्ज फेटाळून लावले आहेत.
‘मास्टर माइंड’ गौतमचे साथीदार इतर जिल्ह्यासह राज्याबाहेरचे !
आरोपी गौतम नरेंद्र माळी बनावट मद्य प्रकरणाचा मुख्यसुत्रधार असून तो यापूर्वीही बऱ्याच गुन्हयांमध्ये फरार आहे. एवढेच नव्हे तर, गौतमचे साथीदार हे जिल्हा व राज्याबाहेरचे असल्याचे देखील तपासात समोर आले आहे. एवढेच नव्हे तर, बनावट मद्याच्या गुन्ह्याची व्याप्ती ही मोठी असून आंतरराज्यीय टोळीचा यात समावेश असल्याचे तपास समोर आहे. दरम्यान, यानिमित्ताने बनावट दारू प्रकरण धरणगावपासून सुरु होत आता थेट गुजरातसह महाराष्ट्रातील इतर जिल्ह्यात पोहचल्याचे दिसून येत आहे.
