धरणगाव (प्रतिनिधी) येथील समस्त कुणबी पाटील समाजातील जेष्ठ संचालक वना छन्नू पाटील यांचे कनिष्ठ चिरंजीव भीमराव वना पाटील यांनी आपल्या विधवा वहिनी सोबत विवाह करून एक आगळा आदर्श घालून दिला. सोबतच भावाचा अपंग मुलगा व मुलगी यांना सांभाळण्याचे वचनही सप्तपदीच्या बंधनात अडकतांना दिले.
याबाबत सविस्तर माहिती अशी की, वना छन्नू पाटील यांचे जेष्ठ चिरंजीव धनराज वना पाटील यांचे ८ महिन्यांपूर्वी दुःखद निधन झाले. पतीचे निधन झाल्यानंतर पत्नी आणि मुले पोरकी झाली. म्हाताऱ्या आई – वडिलांना तरुण मुलगा गमवावा लागला. संघर्षाची परिस्थिती होती त्यात धनराज पाटील यांना दोन अपत्ये आहेत त्यात मुलगी ६ वर्षांची तर ३ वर्षांचा मुलगा. जन्मतः हा मुलगा कमरेच्या खाली पांगळा असल्यामुळे अतिशय कठीण परिस्थिती होती. लेकरांना सांभाळून जगायचं कसं असा प्रश्न पतीच्या निधनानंतर त्या माऊलीसमोर होता. अशा वेळी दिराने आपल्या वहिनी सोबत विवाह करून त्यांना आधार दिला, मुलांना पितृछत्र दिले आणि आई वडिलांच्या मनातील खूप मोठी चिंता दूर करण्याचं कार्य केलं. भिमराव वना पाटील हे एक बांधकाम व्यावसायिक आहेत. पारंपरिक व्यवस्थेला फाटा देत हा आदर्श विवाह निवडक २० ते २५ लोकांच्या उपस्थितीत श्री क्षेत्र पद्मालय येथे संपन्न झाला. यावेळी जवळचे नातेवाईक तसेच समस्त कुणबी पाटील पंच मंडळ लहान माळी वाड्याचे अध्यक्ष भिमराज पाटील, सचिव महेश्वर पाटील, खजिनदार लक्ष्मण पाटील, संचालक गणेश पाटील, परशुराम पाटील, जितेंद्र पाटील (महाराज), अशोक पाटील वरपिता वना छन्नू पाटील त्यांचे चिरंजीव भिमराव पाटील व त्यांच्या पत्नी तसेच सुभाष जोशी, अशोक झुंजारराव आदी उपस्थित होते.
