जळगाव (प्रतिनिधी) वीजबिल अपडेट संदर्भात मोबाइलवर आलेल्या एका अनोळखी मेसेजमधील क्रमांकावर फोन करणे एका डॉक्टरला चांगलेच महागात पडले आहे. अज्ञात भामट्याने डॉक्टरला विश्वासात घेऊन त्यांचे ५९ हजार ८७५ रुपये परस्पर वर्ग करून ऑनलाइन फसवणूक केली.
या संदर्भात अधिक असे की, डॉ. दीपक रमाकांत पाटील (वय ६९, रा. पंचम हॉस्पिटल, भास्कर मार्केट) यांची फसवणूक झाली आहे. डॉ. पाटील यांच्या घराचा वीजपुरवठा १६ जुलै रोजी सकाळी ९.३० वाजता खंडित झाला होता. त्यांनी महावितरणने दिलेल्या अधिकृत फोन नंबरवर संपर्क केला. परंतू हा फोन कुणीही उचलला नाही. त्यानंतर १५ जुलै रोजी डॉ. पाटील यांना ७४७७६२६०९६ या अनोळखी मोबाइलवरून मेसेज आला. या मेसेजमध्ये ‘तुमचे मागील महिन्याचे वीजबिल अपडेट नसल्याने आज रात्री ९.३० वाजता तुमचा पुरवठा खंडित केला जाईल. कृपया ९७४९१७००३७ या नंबरवर संपर्क करा’ असे लिहिलेले होते. विद्युत पुरवठा खंडित होण्याच्या भीतीने डॉ. पाटील यांनी मेसेजवर मिळालेल्या मोबाइलवर संपर्क साधला. या वेळी भामट्याने एक लिंक पाठवली. या लिंकवर क्लिक केल्यानंतर पुन्हा एक अॅप्लिकेशन डाऊनलोड करायला सांगीतले. त्याच्या माध्यमातून सुरूवातीला १० रुपये घेतले. यानंतर भामट्याने डॉ. पाटील यांना विश्वासात घेऊन बँक खात्याच्या संदर्भात माहिती, ओटीपी विचारुन घेतले. काही वेळातच डॉ. पाटील यांच्या खात्यातून ५९ हजार ८७५ रुपये परस्पर वर्ग झाल्याचे मेसेज आले. आपली फसवणूक झाल्याचे डॉ. पाटील यांच्या लक्षात आले. त्यांनी सोमवारी जिल्हापेठ पोलिस ठाण्यात जाऊन फिर्याद दिली. त्यानुसार गुन्हा दाखल करण्यात आला. पोलिस उपनिरीक्षक प्रदीप चांदेलकर तपास करीत आहेत.
