जळगाव (प्रतिनिधी) – घरकाम करणाऱ्या महिलेने दोन घरातून मुद्देमाल चोरुन नेला होता. पोलिसांनी तपासातून संशयित महिलेसह तिचा मध्यप्रदेशातील साथीदार अशा दोघांना ताब्यात घेत अटक केली. त्यांच्याकडून चोरुन नेलेला चार लाखाचा मुद्देमाल हस्तगत केला. समोताबाई राजपाल धांडेकर (वय ३९ मुळ रा. धारणी, ता.अमरोद हमु. रामेश्वर कॉलनी) तसेच तिचा गुन्ह्यातील साथीदार धर्मराज हरिसिंग मीना (वय ३८ वर्षे, रा. ग्राम पिपाराई, गंजबसौदा, श्यामाबाद म.प्र.) अशी संशयितांची नावे आहेत.
शुक्रवारी लेकसाईड रेसिडेन्सी, गणेश घाटजवळ येथील रहिवासी सुधा प्रभुनाथ कावरा (वय ५१ वर्षे) यांच्यासह तेजल पियुष संचेती यांच्या घरातून मुद्देमालाची चोरी झाली होती. याठिकाणी संशयित समोतोबाई धांडेकर घरकामाला होती. तिच्यावर संशय तक्रारीत संशय व्यक्त केला होता. याप्रकरणी एमआयडीसी पोलीस ठाण्यात गुन्हा दाखल त करण्यात आला होता. या गुन्ह्याच्या तपास न कामी पथक नियुक्त करुन संशयितांचा शोध घेण्याचे सुचित केले होते. गोपनिय माहिती तसेच तांत्रीक विश्लेषणाचे अनुषंगाने तपास चक्र फिरविले असता संशयित महिलेचा शोध रामेश्वर कॉलनीत घेत विचारपूस केली. तिने या गुन्ह्याची कबुली देताना या गुन्हयात धर्मराज मीना हा साथीदार असल्याची माहिती दिली. त्यानुसार त्याचा शोध घेऊन पथकाने दोघांना ताब्यात घेतले. २३.१० ग्रॅम वजनाचे सुमारे ३ लाख नऊ हजार किमतीचे सोने तसेच ९९ हजार किमतीचे ९.६४ ग्रॅम वजनाचे सोन्याचे कानातील दागिने असा एकुण चार लाखाचा मुद्देमाल हस्तगत केला. पोलीस अधीक्षक श्रीकांत धिवरे, अपर पोलीस अधीक्षक संदीप गावीत, उपविभागीय पोलीस अधिकारी नितीन गणापुरे यांच्या मार्गदर्शनात पोलीस निरीक्षक बबन आव्हाड नेतृत्तवाखाली गुन्हे शोध पथकातील पोलीस उपनिरीक्षक चंद्रकांत धनके, सफौ विजयसिंग पाटील, पोहेकॉ गिरीश पाटील, किरण चौधरी, प्रमोद लांडवंजारी तसेच कॉन्सटेबल विशाल कोळी, सुभाष साबळे व योगेश घुगे या पथकाने ही कामगिरी केली.
