जळगाव (प्रतिनिधी) – मध्यरात्रीच्या सुमारास गावातील एकविरा मातेच्या मंदिरातील दानपेटी चोरुन नेल्याची घटना दि. २७ जून रोजी तालुक्यातील आमोदा बु. गावात घडली. चोरटे गावाकडून न येता गिरणा नदीपात्राकडून मंदिरात पोहचले. दरम्यान, चोरीची संपुर्ण घटना मंदिरातील सीसीटीव्ही कॅमेऱ्यात कैद झाली असून पोलिसांनी ते फुटेज ताब्यात घेतले. तर दानपेटी ही मंदिरापासून जवळच असलेल्या झुडपात मिळून आली. याप्रकरणी तालुका पोलीस ठाण्यात अज्ञात चोरट्यांविरुद्ध गुन्हा दाखल करण्यात आला आहे.
जळगाव तालुक्यातील आमोदा बु. गावात राहणारे पंढरीनाथ आसाराम सुर्यवंशी (वय ७३) हे सेवानिवृत्त पोस्ट मास्टर आहे. दि. २६ जून रोजी रात्री साडेसात वाजेच्या सुमारास त्यांच्या गावातील भिकारी गुलचंद पाटील यांच्या जागेत बांधलेल्या एकविरा मातेच्या मंदिरातील पुजारी पंजाबराव अजबराव सुर्यवंशी हे मंदिर बंद करुन घरी निघून गेले. दरम्यान, दुसऱ्या दिवशी पहाटे साडेचार वाजेच्या सुमारास पुजारी सुर्यवंशी हे नित्यनियमाप्रमाणे पुजेसाठी मंदिरात आले असता, त्यांना मंदिरातील दानपेटी चोरी गेल्याचे दिसले. त्यांनी लागलीच फोन करुन घटनेची माहिती पंढरीनाथ सुर्यवंशी यांना दिल्यानंतर ते देखील तात्काळ मंदिरात पोहचले.
अनेक दिवसांपासून जमा झाली होती रक्कम
तालुक्यातील आमोदा येथे एकवीरा मातेचे मंदिर असून या ठिकाणी असलेल्या दानपेटीत अनेक दिवसांपासूनची रक्कम जमा झाली होती. दि. २७ जून रोजी मध्यरात्री अज्ञात चोरट्यांनी गावाकडून येणाऱ्या रस्त्याने न येता मंदिराच्या मागे असलेल्या गिरणा नदी पात्राकडून येणाऱ्या रस्त्याने मंदिराजवळ पोहचले.
झाडाझुडपात फेकून दिली दानपेटी
चोरटे स्वच्छतागृहाच्या भिंतीवर चढून ते मंदिरात उतरले. तेथून त्यांनी दानपेटीच उचलून नेली. त्यानंतर साधारण ३०० ते ४०० मीटर अंतरावर असलेल्या पीरबाबा टेकडीजवळ नेऊन दानपेटी फोडली आणि दानपेटी तेथील झाडाझुडपात फेकून देत त्यातील रोकड घेवून चोरटे पसार झाले.
पोलिसांची घटनास्थळी पाहणी
पहाटे पुजारी पंजाबराव सूर्यवंशी हे मंदिरात आले तेव्हा ही घटना त्यांच्या लक्षात आली. त्यांनी मंदिराचे पदाधिकारी व ग्रामस्थांना कळविले. त्या वेळी या सर्व मंडळींसह तालुका पोलिस ठाण्याचे पोहेकॉ प्रवीण पाटील, दिनेश चव्हाण हे घटनास्थळी पोहचल्यानंतर त्यांनी मंदिराच्या परिसरात पाहणी केली.
मंदिराच्या सीसीटीव्हीत चोरटे कैद
सीसीटीव्ही कॅमेऱ्यांचे फुटेज तपासले असता, त्यांना मध्यरात्री १ वाजून ५५ मिनिटांनी चोरटे मंदिरात शिरले आणि त्यांनी अडीच वाजेच्या सुमारास दानपेटी चोरुन नेल्याचे कैद झाले आहे. ते सीसीटीव्ही फुटेज पोलिसांनी जप्त केले असून याप्रकरणी तालुका पोलीसात गुन्हा दाखल करण्यात आला आहे.
