जालना (वृत्तसंस्था) आठवडाभरापुर्वीच भाजपचे नेते किरीट सोमय्या यांनी शिवसेनेचे नेते आणि माजी मंत्री अर्जून खोतकर यांच्यावर जालना रामनगर सहकारी साखर कारखाना खरेदीत शंभर कोटींचा घोटाळा केल्याचा आरोप केला होता. त्यांनतर काही दिवसांतच ईडीने अर्जून खोतकर यांच्यावर कारवाई सुरू केली आहे. जालना येथील खोतकर यांच्या निवासस्थानी आज सकाळीच ईडीने धाड टाकली. यामुळे राजकीय वर्तुळात एकच खळबळ उडाली आहे.
शिवसेनेचे नेते अर्जून खोतकर यांच्या निवासस्थानी शुक्रवारी (२६ नोव्हेंबर) सकाळीच साडे आठ वाजल्यापासून ईडीचं पथक खोतकरांच्या भाग्यनगर येथील बंगल्यात दाखल झाले. १२ जणांच्या या पथकाने घराचे दरवाजे आतून लावून घेत तपासणी सुरु केली आहे. यावेळी अर्जून खोतकर घरीच होते, अशी माहिती आहे. औरंगाबादमधील उद्योजकांच्या माध्यमातून रामनगर सहकारी साखर कारखान्यात आर्थिक संबंध असल्याची तक्रार सोमय्यांनी केली होती. यापूर्वी खोतकरांनी हे सर्व आरोप फेटाळून लावले आहेत. आपले काही लाखांचे शेअर्स कारखान्यात आहेत. आपण भागीदार आहोत, मालक नाही, असं स्पष्टीकरण खोतकरांनी दिलं होतं.
अर्जून खोतकर हे सध्या जालन्यातील कृषी उत्पन्न बाजार समितीचे सभापती आहेत. त्यामुळे जालन्यातील कृषी उत्पन्न बाजार समितीचीही ईडीकडून तपासणी करण्यात आली. जालन्यात आज सकाळीच या दोन ठिकाणी सक्तवसुली संचलनालयातर्फे धाडी टाकण्यात आल्या.
