जळगाव (प्रतिनिधी) थकीत कर्ज रकमेच्या वन टाईम सेटलमेंटसाठी दीड लाख रुपयांची लाच घेणाऱ्या भाईचंद हिराचंद राययोनी मल्टी स्टेट को-ऑप. क्रेडीट सोसायटीचा अवसायक चैतन्य नासरे व वसुली अधिकारी सुनील पाटील या दोघांना तीन दिवसांची पोलिस कोठडी सुनावली. त्यांच्या कार्यालयाच्या झडतीमध्ये सुनील पाटील याच्या ड्रावरमध्ये आठ लाख १२ हजार रुपये आढळून आली. ही रक्कम कशाची आहे यासह इतर मुद्यांवर दोघांची चौकशी केली जात आहे.
कर्ज प्रकरणाच्या वन टाईम सेटलमेंटसाठी दीड लाख रुपयांची लाच स्विकारल्याप्रकरणी अवसायक चैतन्य नासरे व वसुली अधिकारी सुनील पाटील या दोघांना लाचलुचपत प्रतिबंधक विभागाच्या पथकाने मंगळवारी रंगेहाथ पकडले होते. या प्रकरणी एमआयडीसी पोलिस ठाण्यात गुन्हा दाखल करण्यात आला. दोघांना बुधवारी न्यायालयात हजर केले असता न्या. जे.जे. मोहिते यांनी तीन दिवसांची पोलिस कोठडी सुनावली.
सरकार पक्षातर्फे जिल्हा सरकारी वकील अॅड. सुरेंद्र काबरा यांनी युक्तीवाद केला. ५० प्रकरणांमध्ये वन टाईम सेटलमेंट वन टाईम सेटलमेंटसाठी दीड लाख लाच मागितल्याच्या या प्रकरणानंतर आता इतरही प्रकरणाची चौकशी होणार आहे. नासरे हे सन २०२१ पासून अवसायक असून त्यांच्या काळात आतापर्यंत ५० प्रकरणांमध्ये वन टाईम सेटलमेंट करण्यात आली आहे. त्या प्रकरणातही लाच स्वीकारली आहे का, याची देखील आता चौकशी केली जात आहे.
अपसंपदेची केली जातेय चौकशी दोघांनी किती प्रकरणांमध्ये लाच मागितली आहे?, यामध्ये इतर कोणाचा सहभाग आहे का, दोघ लाचखोरांकडे असलेल्या मालमत्तेचा तपास करून पुढील कारवाई करणे, बीएचआरच्या कार्यालयातील कॅशिअरकडे रोख रकमेचा भरणा असताना वसुली अधिकाऱ्याच्या ड्रावरमध्ये आठ लाख १२ हजार आढळून आल्याने त्याची चौकशी करणे, अवसायक नासरे नागपूर येथील रहिवासी असून त्यांच्या जंगम, स्थावर मालमत्तेची माहिती घेणे, डी मॅट अकाउंट, बँक लॉकर व इतर गुंतवणुकीची माहिती घेणे, दोघांच्या अपसंपदेची चौकशी करणे व इतर बाबींसाठी त्यांना पोलीस कोठडी सुनावली.
