जळगाव (प्रतिनिधी) भाईचंद हिराचंद रायसोनी मल्टिस्टेट को-ऑपरेटिव्ह क्रेडिट सोसायटी अर्थात बीएचआर संस्था घोटाळ्याप्रकरणी माजी मंत्री आणि राष्ट्रवादीचे नेते एकनाथराव खडसे हे आज सायंकाळी चार वाजेला पत्रकार परिषद घेणार आहेत. दरम्यान, आज खडसे नेमका आज काय धमाका करतात?, कुणा-कुणाची नावं घेतात, याकडे सर्वांचे लक्ष लागून आहे.
आर्थिक गुन्हे शाखेकडून चौकशी सुरू असल्याने यादरम्यान बोलणे योग्य ठरणार नाही. आपल्याकडे याविषयीची कागदपत्रे, पत्रव्यवहार असून दोन दिवसात ही सर्व माहिती पत्रकार परिषद घेऊन देतो, असे एकनाथराव खडसे यांनी माध्यमांशी बोलतांना सांगितले होते. एवढेच नव्हे तर, या प्रकरणात जिल्ह्यातील दिग्गजच असून संस्थेची मालमत्ता कवडीमोल भावात घेतलेल्या आमदार, खासदार, माजी मंत्री याची पण माहिती आपल्याकडे असून ती देणार असल्याचेही खडसे म्हणाले होते. तसेच दुसरीकडे एकनाथराव खडसे यांनी ‘बीएचआर’पतसंस्थेतील ठेवीदारांची फसवणूक हा अत्यंत मोठा गुन्हा असून यात शेकडो जण गुंतलेले आहेत.राज्यात फडणवीस यांचे सरकार असतांना त्यांनी हे प्रकरण दडपले गेल्याचाही आरोप खडसे यांनी केला होता. दरम्यान, आज खडसे पत्रकार परिषदेत काय बोलतात, याची उत्सुकता राजकीय वर्तुळात लागून आहे. दरम्यान, शहरातील मुक्ताई बंगल्यावर पत्रकार परिषद होणार असल्याचे पीआरओंनी कळविले आहे.
