मुंबई (वृत्तसंस्था) भाजपचे ज्येष्ठ नेते एकनाथराव खडसेंचा राष्ट्रवादीत प्रवेश हा निश्चित मानला जात आहे. लवकरच राष्ट्रवादीकडून खडसे यांच्या पक्षप्रवेशाबद्दल अधिकृत घोषणा करण्यात येणार असल्याची माहिती समोर आली आहे.
‘लोकमत न्यूज १८’ या वृत्तवाहिनीने दिलेल्या वृत्तात म्हटले आहे की, एकनाथराव खडसे यांचा राष्ट्रवादी प्रवेश निश्चित मानला जात आहे. लवकरच खडसे आणि राष्ट्रवादी काँग्रेसकडून याबद्दल अधिकृत घोषणा केली जाणार आहे. राष्ट्रवादीत प्रवेशानंतर एकनाथ खडसे यांच्यावर पक्ष संघटनेत मोठी जबाबदारी सोपवण्यात येणार असल्याची माहिती आहे. विशेष म्हणजे, यापूर्वी राष्ट्रवादीसह महाविकास आघाडीच्या नेत्यांनी एकनाथराव खडसे यांच्याप्रवेशाबद्दल भाष्य केले होते. ‘एकनाथ खडसे काँग्रेसमध्ये आले तर आनंद होईल’ असं काँग्रेसचे ज्येष्ठ नेते बाळासाहेब थोरात यांनी म्हटले होते. त्याचबरोबर शिवसेनेचे मंत्री उदय सामंत यांनी सुद्धा, खडसे यांनी शिवसेनेत यावे असे म्हटले होते.
