भाईंदर (वृत्तसंस्था) मिरा-भाईंदर महापालिकेच्या कंत्राटी कनिष्ठ अभियंत्याला मारहाण केल्याप्रकरणात आमदार गीता जैन यांच्याविरोधात काशी मिरा पोलिस ठाण्यात तक्रार अर्ज देण्यात आला आहे. तर आमदार गीता जैन यांनी मात्र महिलांचा अपमान जो कुणी करेल त्याला मी चोपणाराच अशा भूमिकेवर ठाम असल्याचं दिसून येत आहे.
मिरा रोडच्या पेणकर येथील कक्कड इमारती लगत असणाऱ्या जागेतील एका झोपड्यावर १६ जून रोजी पालिकेच्या अतिक्रमण विभागाच्या पथकाकडून कारवाई करण्यात आली. विनवण्या केल्यानंतरही भर पावसात लहान मुलांना आणि गर्भवती महिलेला बळजबरीने घरातून बाहेरकडून पथकाकडून कारवाई करण्यात येत असल्यामुळे पिडीत कुटुंबाने आमदार गीता जैन यांच्याकडे तक्रार केली होती. त्या घरात लहान मुले आहेत, कुटुंब राहात आहे, आणि तुम्ही घर तोडायचं काम करता, तुम्ही माणसं आहात की राक्षस असं म्हणत आमदार जैन यांनी संबंधित अधिकाऱ्यांनी कानउघडणी केली.
पावसाळ्यात बांधकामांवर कारवाई न करण्याचे शासनाचे आदेश असताना पालिकेमार्फत कारवाई का करण्यात आली? असा सवाल केला. एवढेच नव्हे तर हा मुद्दा आपण विधिमंडळात उपस्थित करणार, असे त्यांनी सांगितले. आपण आता का काही बोलत नाही? असा सवाल त्यांनी मनपाचे अभियंता शुभम पाटील व इतर कर्मचाऱ्यांना केला. त्यावर अभियंता पाटील हा बेजबाबदाररित्या हसू लागल्याने जैन यांना राग अनावर झाला. यावेळी, आमदारांचे शब्द ऐकताना अभियंता शुभम पाटील हे हसत असल्याने आमदार गीत जैन यांचा राग अनावर झाला आणि त्यांच्या थेट कानशिलात लगावली.
मिरा-भाईंदर महापालिकेच्या कंत्राटी कनिष्ठ अभियंत्याला मारहाण झाल्याप्रकरणात आमदार गीता जैन यांच्याविरोधात मंगळवारी रात्री उशिरा काशी मिरा पोलिस ठाण्यात तक्रार अर्ज देण्यात आला आहे. कनिष्ठ अभियंता शुभम पाटील यांनी मारहणप्रकरणी आमदार गीता जैन यांची चौकशी करून त्यांच्यावर कारवाई करावी, अशी मागणी पोलिस ठाण्याला दिलेल्या पत्रात केली आहे. तर दुसरीकडे भाजपचे माजी आमदार नरेंद्र मेहता यांनी निषेध करत आ. जैन यांच्यावर गुन्हा दाखल करण्याची मागणी केली आहे. तर ७ दिवसाच्या नवजात मुलीला भर पावसात बेघर करणाऱ्या व बलात्कार, भ्रष्टाचार सह अनेक गंभीर गुन्हे असलेल्या कुख्यात लोकांना बोलण्याचा नैतिक अधिकार नसल्याचा टोला आ. जैन यांनी मेहतांना लगावला आहे.
