गंगापूर (वृत्तसंस्था) मुलीचा पुढील इयत्तेत प्रवेश घेण्यासाठी दाखला घेऊन निघालेल्या वडिलांचा अज्ञात वाहनाच्या धडकेत जागीच मृत्यू झाल्याची घटना कायगाव मार्गावर बुधवारी (दि. २१) सायंकाळच्या सुमारास घडली. संदीप सावळीराम शिंदे (वय ३५, रा. भोकर, ता. श्रीरामपूर. ह. मु. गंगापूर) असे अपघातातील मयताचे नाव आहे.
भोकर येथील संदीप शिंदे हे आपल्या मोलमजुरी करून कुटुंबाचा उदरनिर्वाह चालवीत होते. मुलगी श्रुतिका हिचा गंगापूर येथील शाळेत इयत्ता ९ वी मध्ये प्रवेश घ्यायचा असल्यामुळे शिंदे हे आपल्या मुलीचा शाळा सोडण्याचा दाखला आणण्यासाठी दुचाकीवरून भोकर येथे गेले होते. परत येत असताना शहराजवळ सायंकाळच्या सुमारास त्यांच्या दुचाकीला अज्ञात वाहनाने धडक दिली. यात त्यांचा जागीच मृत्यू झाला. त्यांच्या पश्चात आई, वडील, पत्नी, मुलगा, मुलगी, दोन भाऊ असा परिवार आहे.
