बोदवड (प्रतिनिधी) तूप विक्रीच्या बहाण्याने आलेल्या महिलेने बाथरूमला जाण्याच्या बहाण्याने घरात प्रवेश केला. बाथरूममधून बाहेर पडताच भामट्या महिलेने रुमाल झटकला. त्यानंतर पती-पत्नीची शुद्ध हरपली. अवघ्या काही मिनिटात या भामट्या महिलने घरातील रोकड, दागिने असा पाच लाखांचा ऐवज चोरून पोबारा केला.
बाथरूमला जाण्याच्या बहाण्याने घरात प्रवेश !
खासगी बँकेत पिम्मी एजंट असलेले कैलास नारायण शर्मा (वय ५१) हे पत्नी सुरेखा, मुलगी वैष्णवी, मुलगा ऋषिकेश व महेश यांच्यासह साकरला कॉलनीत वास्तव्यास आहेत. दि. ३० डिसेंबर रोजी दुपारी साधारण १२ वाजता कैलास शर्मा व पत्नी घरात खालच्या रूममध्ये होते. यावेळी गायीचे तूप विक्री करणारी अनोळखी महिला रस्त्याने फिरत होती. तिने ओट्यावर येऊन सुरेखा शर्मा यांच्याकडे पाणी मागितले. त्या पाणी घेण्यास घरात गेल्यावर संशयित महिलेने सुद्धा घरात प्रवेश करत बाथरूमला जायचे, असल्याची थाप मारली.
दोघांची शुद्ध हरपली !
बाथरूम मधून बाहेर आल्यावर तीने हातरुमाल दोन्ही पती-पत्नीच्या चेहऱ्यासमोर झटकला. यानंतर दोघांची शुद्ध हरपल्यासारखे होताच तिने कपाटातून ३ लाख २५ हजार रूपये रोख आणि ५३ हजारांचे दागिने लांबवले. शर्मा यांची मुलगी खालील रुममध्ये आल्यावर चोरी उघडकीस आली. यानंतर महिलेचा शोध घेतला पण ती सापडली नाही. याप्रकरणी अज्ञात महिलेविरुद्ध गुन्हा दाखल झाला आहे. या घटनेमुळे बोदवड शहरात खळबळ उडाली असून महिलांमध्ये भीतीचे वातावरण पसरले आहे. पोलिसांनी देखील अनोळखी लोकांबाबत नागरिकांनी सावध राहावे, असे आवाहन केले आहे.
