भुसावळ (प्रतिनिधी) बायोडिझेलच्या प्रकरणात तक्रारदाराच्या मित्रास सहआरोपी न करण्यासाठी पाच लाखांची लाच मागून तडजोडीअंती तीन लाख रुपयांची लाच स्वीकारल्याप्रकरणी खाजगी पंटरला तर लाच स्वीकारण्याचे सांगणारे पोलीस निरीक्षकासह एका पोलीस कर्मचारीविरुद्ध गुन्हा दाखल करण्यात आला आहे. ऋषी दुर्गादास शुक्ला याला एसीबीच्या पथकाने रंगेहात अटक केली. तर भुसावळ बाजारपेठ पोलीस ठाण्याचे निरीक्षक राहुल गायकवाड यांच्यासह रायटर तुषार पाटील यांच्या सांगण्यावरून व प्रोत्साहित केल्यावरून त्यांच्याविरुद्ध देखील गुन्हा दाखल करण्यात आला आहे. ही कारवाई धुळे एसीबीच्या पथकाने केली आहे.
एलसीबीने काही दिवसांपूर्वी बायोडिझेलची वाहतूक करणारा टँकर पकडून बाजारपेठ पोलिसांकडे कारवाईसाठी दिला होता. मात्र, गुन्हा दाखल प्रकरणात तक्रारदाराच्या मित्रास सहआरोपी न करण्याच्या मोबदल्यात 15 लाखांची मागणी करण्यात आली. सुरूवातीला तीन लाख रुपये घेवून नंतर पुन्हा 12 लाख रुपये मागण्यात आल्याने तक्रारदाराने धुळे एसीबीकडे तक्रार नोंदवली. धुळे एसीबीच्या पथकाने सापळा रचला. त्यानुसार ऋषी शुक्ला याला लाच स्वीकारताच अटक करण्यात आली.
तर पोलीस निरीक्षक गायकवाड आणि रायटर तुषार पाटील यांच्या सांगण्यावरून व त्यांनीच लाच मागण्यास प्रोत्साहित केल्याचे एसीबीने म्हटले आहे. तर पो.नि. गायकवाड आणि खाजगी पंटर ताब्यात घेण्यात आले असून पोलीस कर्मचारीचा शोध सुरु असल्याची माहिती सूत्रांनी दिली आहे. ही कारवाई नाशिक पोलीस अधीक्षक शर्मिष्ठा वालावलकर यांच्या मार्गदर्शनाखाली धुळे पोलीस उपअधीक्षक अभिषेक पाटील व सहकार्‍यांनी केली. एसीबीच्या या कारवाईने पोलीस वर्तुळात प्रचंड खळबळ उडाली आहे.
