कळवण (वृत्तसंस्था) तालुक्यातील लिंगामे येथे विहिरीत दोन मुलींचे मृतदेह आढळल्याने खळबळ उडाली आहे. माधुरी गोकुळ मोरे (वय २०, रा. लिंगामे) व गीतांजली अल्केश एखंडे (वय १३, रा. धोडांबे, ता. सुरगाणा) अशी या मुलींची नावे आहेत.
गोपीनाथ मोतीलाल पालवी यांचे लिंगामे शिवारातील शेत गट नंबर १०६ मधील विहिरीत सोमवारी (दि. २६) सकाळी माधुरी मोरे व गीतांजली एखंडे यांचे मृतदेह पाण्यावर तरंगताना आढळून आले. येथील पोलीस पाटील एकनाथ पालवी यांनी याबाबत अभोणा पोलिसांना माहिती दिली. पोलिसांनी तत्काळ घटनास्थळी धाव घेतली. मृतदेह ग्रामस्थांच्या मदतीने विहिरीतून बाहेर काढून अभोणा येथील शासकीय ग्रामीण रुग्णालयात उत्तरीय तपासणीसाठी पाठविण्यात आले. याबाबत अभोणा पोलिसतिं अकस्मात मृत्यूची नोंद करण्यात आली आहे.
याप्रकरणी पोलीस उपनिरीक्षक यशवंत शिंदे यांच्या मार्गदर्शनाखाली पोलीस उपनिरीक्षक रसाळ तपास करीत आहेत. राज्यात बदलापूर येथे अल्पवयीन मुलींवर अत्याचाराची घटना ताजी असताना कळवणसारख्या आदिवासी बहुल भागात दोन मुलींचे मृतदेह आढळून आल्यामुळे खळबळ उडाली आहे. अभोणा पोलिसांनी कसून शोधकार्य सुरू केले असून, रात्री उशिरापावेतो कोणतेही धागेदोरे हाती लागलेले नव्हते.
या दोघी २५ ऑगस्टपासून बेपत्ता होत्या. तेव्हापासून या दोन्ही मुलींच्या घरचे त्यांचा शोध घेत होते. कळवणच्या लिंगामे गावातील गोपीनाथ पालवी यांच्या शेतातील विहिरीमध्ये या दोन्ही मुलींचे मृतदेह २६ ऑगस्ट रोजी आढळले होते. आता याप्रकरणी भावना पोलिसांकडून अकस्मात मृत्यूची नोंद करण्यात आलीय. आत्महत्या की घातपात, याबाबत पोलिसांकडून तपास सुरू आहे. नक्की या घटनेमागे कोणतं गुढ दडलंय, याचा पोलीस शोध घेत आहेत.
