जळगाव (प्रतिनिधी) खरात हत्याकांडातील संशयीत असलेल्या राजा मोघे याने दोन पंटर दुकानात पाठवून त्याच्या जवळील मोबाईल दोन व्यापाऱ्यांकडून खंडणी मागितल्या प्रकार उघडकीस आल्यानंतर प्रचंड खळबळ उडाली होती. या प्रकरणी गुन्हा दाखल झाल्यानंतर स्थानिक गुन्हे शाखेच्या पथकाने संशयीत आरोपी योगेश मोघे याला आज जळगावातून सापळा रचून अटक केली आहे.
या संदर्भात अधिक असे की, शहरातील गुजराथ स्विट मार्टमध्ये तोंडाला रुमाल बांधून आलेल्या दोन युवकांनी कपिल मेहता यांना मोबाईल दिला. भाई का फोन है, बात करलो असे सांगितले. मेहता यांनी फोन घेतल्यावर तिकडून मै राजा मोघे बोल रहा हूँ, खरात हत्याकांड का आरोपी हूँ, मै कोर्ट मे तारीख पर आ रहा हूँ, १० हजार रूपये ये लड़को के पास देना, यावर मेहता यांनी पैसे नसल्याचे सांगितले. त्यामुळे तुम्हे दुकान चलाना है तो पैसे देने पड़ेंगे, असे सांगितल्यावर मेहता यांनी दोन्ही पंटरांना मी कोर्टात येतो असे सांगितले. ही बाब मेहता यांनी अन्य व्यापाऱ्यांना सांगितली. त्यामुळे सर्वच व्यापारी गुजराथ स्वीट जवळ जमा झाले आणि व्यापाऱ्यांनी शहर पोलिस ठाण्यात धाव घेतली. खंडणी मागण्यासाठी आलेल्या दोघांकडे पिस्तुल होते, असेही व्यापाऱ्यांनी सांगितले. मेहता यांच्याकडे खंडणी मागणाऱ्या दोघांनी गोपी शॉपींग मॉलमधील रवी झामनानी यांच्याकडेही २० हजाराची मागणी केली होती.
याबाबत भुसावळ शहर पोलिस स्टेशनला गु.र.नं. 94/23 भा.द.वि. कलम 385, 387, 34 नुसार आणि भुसावळ बाजारपेठ पोलिस स्टेशनला गु.र.न. 202/23 भा.द.वि. 385, 387, 34 नुसार गुन्हा दाखल करण्यात आला होता. या गुन्ह्यातील संशयीत आरोपींचा शोध घेण्यासाठी स्थानिक गुन्हे शाखेचे पो.नि. किसनराव नजनपाटील यांनी एका पथकाची निर्मिती केली होती. सहायक फौजदार रवी नरवाडे, हे.कॉ. संदिप सावळे, पो.ना. रणजीत जाधव, पो.ना. क्रिष्णा देशमुख, पो.कॉ. ईश्वर पाटील, पो.कॉ. प्रमोद ठाकुर आदींचा या पथकात सहभाग होता.
संशयीत आरोपी योगेश मोघे हा जळगाव शहरातील खोटे नगर परिसरात आपली ओळख लपवून रहात असल्याची गोपनीय माहिती स्थानिक गुन्हे शाखेचे पो.नि. किसनराव नजनपाटील यांना समजली. त्या माहितीच्या आधारे त्यांच्या पथकाने योगेश मोघे याला शिताफिने ताब्यात घेत अटक केली आहे. पुढील कारवाईकामी त्याला भुसावळ शहर पोलिस स्टेशनच्या ताब्यात देण्यात आले आहे.
