चोपडा (प्रतिनिधी) शहरातील मेन रोडवरील अॅक्सिस बँकेच्या शाखेत एकाने एटीएम मशीनद्वारे २० हजार रुपयांचा भरणा केला. त्यातील पाचशे रुपयांच्या पाच नोटा बनावट असल्याचे समोर आल्यानंतर चोपडा शहर पोलिस ठाण्यात गोकुळ वासुदेव सोनवणे (रा. विद्या विहार कॉलनी, चोपडा) याच्यांविरोधात गुन्हा दाखल करण्यात आला आहे.
दि.१७ ते १८ दरम्यान मुख्य रस्त्यावरील अॅक्सिस बँकेच्या डिपॉझीट मशीनमध्ये गोकुळ वासुदेव सोनवणे (रा. विद्याविहार कॉलनी, चोपडा) यांनी २० हजार रुपयांचा भरणा केला त्यानंतर सोनवने यांना १७ हजार ५०० रुपयेच खात्यात जमा झाल्याचा संदेश मिळाला. उर्वरित रक्कम का जमा झाली नाही?, म्हणून सोनवणे यांनी बँकेशी संपर्क साधला. त्यावेळी संबंधित कर्मचारी हर्षल जयविलास जैन यांच्याकडे विचारणा केली.
जैन यांनी मशीन उघडल्यावर सांगता येईल, असे सांगितले. त्यानंतर मशीन उघडले असता पाचशे रुपयांच्या पाच नोटा बनावट असल्याने डिपॉझिट झाल्या नसल्याचा प्रकार समोर आला. याबाबत हर्षल जैन यांच्या फिर्यादीवरून चोपडा शहर पोलिस ठाण्यात गोकुळ सोनवणे विरुद्ध गुन्हा दाखल करण्यात आला आहे. प्रभारी पोलिस निरीक्षक कावेरी कमलाकर यांनी बँकेत भेट देऊन माहिती घेतली. यावेळी त्यांनी बँकेच्या अधिकाऱ्यांकडून माहिती जाणून घेतली.
