चोपडा (प्रतिनिधी) चोपडा ते धरणगाव रस्त्यावर झालेल्या अपघातात जामनेर तालुक्यातील पिंपरखेडा येथील एका तरुणाचा मृत्यू झाल्याची दुर्दैवी घटना घडली आहे. तुषार मधुकर सोनवणे (वय २४), असे मयत तरुणाचे नाव आहे.
जामनेर तालुक्यातील पिंपरखेडा येथील तुषार सोनवणे हा त्याचा मित्र तथा जामनेर तालुक्यातील सामरोद येथील रहिवासी सौरव गजानन सपकाळ (वय २१) हे दोघेही दि. १२ रोजी दुपारी पावणेचार वाजेच्या सुमारास चोपड्याकडून जामनेरकडे जात होते. चोपडा ते धरणगाव रस्त्यावरील मजरेहोळ गावाचा फाटा ते चोपडा सूतगिरणीदरम्यान त्यांच्या दुचाकीला अज्ञात वाहनाने धडक दिली.
या अपघातात तुषार मधुकर सोनवणे हा गाडीखाली आल्याने जागीच ठार झाला, तर सौरव सपकाळ हा देखील या अपघातात जखमी झाला आहे. या अपघातात तुषार सोनवणेच्या डोक्याच्या चेंदामेंदा झाला आहे. मृत तुषार सोनवणे हा जामनेर शहरात सलून दुकानावर कामाला होता. त्याच्या पश्चात आई-वडील, दोन बहिणी असा परिवार आहे. तो घरातला कर्ता व एकुलता एक मुलगा होता.
या घटनेची माहिती मिळताच आई-वडिलांसह बहिणींनी काळीज चिरणारा आक्रोश केला. दरम्यान, चोपडा उपजिल्हा रुग्णालयात शवविच्छेदन केल्यानंतर तुषार सोनवणे याचा मृतदेह नातेवाईकांच्या ताब्यात देण्यात आला. या प्रकरणी चोपडा शहर पोलीस ठाण्यात अकस्मात मृत्युची नोंद करण्यात आली आहे.
