धरणगाव (प्रतिनिधी) आधी पती-पत्नी दोघांनी मनसोक्त दारू ढोसली मग किरकोळ कारणातून त्यांच्यात वाद झाला. त्यानंतर पतीने पत्नीला सर्पदंश झाल्याचा बनाव केला. पण पोलिसांनी खाक्या दाखवताच तो पोपटा सारखा बोलू लागला.
काय घडलं नेमकं ३० तारखेला
या संदर्भात अधिक असे की, नामदेव रामा जाधव आणि त्याची पत्नी विठाबाई जाधव ( दोघं रा. कुशेळावाडी ता. मानगाव जि. रायगड हल्ली मुक्काम खर्दे ता. धरणगाव) हे खर्दे येथील विट भट्टीवर काम करण्यासाठी साधारण १० दिवसापूर्वी आले होते. ३० डिसेंबर रोजी सायंकाळी ४ वाजेच्या सुमारास पत्नी विठाबाई व पती नामदेव जाधव या दोघांनी मनसोक्त दारू ढोसली होती. नामदेवने विभट्टीसाठी कोळसा व गवत आण असे विठाबाईला सांगितले. परंतू विठाबाई शिवीगाळ करू लागली. यामुळे संतापलेला नामदेवने बाजूला पडलेले लाकूड तिच्या चेहऱ्यावर आणि डोक्यात मारले. यामुळे विठाबाई जागेवरच कोसळली. भेदरलेल्या नामदेवने आपल्या ठेकेदाराला फोन करून माझी पत्नी विठाबाईला सर्पदंश झाल्याची माहिती दिली. यानंतर जखमी अवस्थेत नामदेव जाधवने पत्नीला रुग्णालयात दाखल केले होते.
असा झाला बनाव उघड
जखमी अवस्थेत विठाबाईला जिल्हा रुग्णालयात दाखल करण्यात आले होते. परंतु मयत विठाबाईला कुठं ही सर्पदंश झाल्याचे दिसून येत नव्हते. तसेच तिच्या चेहऱ्यावर ओरखडल्याच्या जखमा होत्या. याची माहिती डॉक्टरांनी पोलिसांनी दिली. त्यानंतर पोलीस निरीक्षक शंकर शेळके यांनी एक टीम तात्काळ जळगाव रवाना केली आणि स्वत: खर्दे गावी घटनास्थळी गेले. त्याठिकाणी त्यांना दारूच्या दोन पोथाऱ्या आढळून आल्या. तसेच पती-पत्नी गावाबाहेर एका ताडपत्रीची झोपडी करून राहत असल्यामुळे तिसऱ्या व्यक्तीचा येथे काहीही संबंध नाही, हे पो.नि. शेळके यांच्या लक्षात आले. त्यानंतर त्यांनी संशयित म्हनून लागलीच नामदेवला ताब्यात घेतले. थोड्या खाक्या दाखवताच आरोपी नामदेव हा पोपटासारखा बोलू लागला आणि संपूर्ण घटना खरी-खरी सांगून टाकली.
सुरुवातीला पतीने सर्पदंशाचा बनाव केला होता. परंतू पोलिसांनी संशयातून तपासाला सुरुवात केली. नामदेवला ताब्यात घेऊन विचारणा केली असता त्याने पत्नीच्या डोक्यात लाकूड टाकल्याचे मान्य केले आहे. पोलिसांनी योग्य तो तपास केल्यामुळे आरोपीला तत्काळ अटक करून गुन्ह्याची उकल करणे शक्य झाले. आज दुपारी आरोपीला कोर्टात हजर करणार आहोत.
-शंकर शेळके
पोलीस निरीक्षक, धरणगाव
