शहादा (प्रतिनिधी) शासकीय जमिनीवर आपला मालकी हक्क गाजविण्यासाठी झालेला वाद गोळीबारापर्यंत पोहचला. या हत्याकांडात पिता-पुत्राचा बळी गेला आहे. शिवाय आठ जण गंभीर जखमी झाले. अविनाश सुखराम खर्डे (वय २६), सुखराम कलजी खर्डे (वय ४५) अशी मृत्यू झालेल्या पिता-पुत्राचे नाव आहे.
पिपलीपाडा तणावाचे आणि दहशतीचे वातावरण !
शहादा तालुक्यातील मलगाव गावापासून अडीच किलोमीटर अंतरावर असलेल्या पिपलीपाडा येथे घडलेल्या या घटनेने परिसरात तणावाचे आणि दहशतीचे वातावरण निर्माण झाले आहे. यामुळे याठिकाणी मोठ्या प्रमाणावर फौजफाटा दाखल झाला असून चोख पोलीस बंदोबस्त लावण्यात आला आहे. शहादा तालुक्यातील मलगाव येथून अडीच किमी अंतरावर पिपलीपाडा आहे.
नेमका वाद काय ?
याठिकाणी सुखराम खर्डे हे शासकीय जमीन कसत होते. या जमिनीबाबत नातेवाइकांमध्ये वाद असल्याने तो न्यायप्रविष्ट होता. गुरुवारी सकाळी नऊ वाजेच्या सुमारास सुखराम खर्डे हे आपल्या कुटुंबासह शेतात निंदणी करत होते. या वेळी सुनील राजेंद्र पावरा, अरुण राजेंद्र पावरा, ललिता राजेंद्र पावरा (रा. बेडिया, ता. पानसेमल, मध्य प्रदेश), गणेश दिवाण खर्डे, सोनीबाई गणेश खर्डे, रमीबाई दिवाण खर्डे (रा. मलगाव, ता. शहादा) ही मंडळी शेतात आली. त्यांनी ‘तुम्ही शेतात निंदणी करू नका, ही जमीन आमची आहे’ असे सांगितले. या कारणावरून दोन्ही कुटुंबांमध्ये वाद झाला. त्याचे पर्यवसन हाणामारीत झाले.
गावठी कट्ट्यातून दोन राउंड फायर !
या हाणामारीत तलवारी, विळा, लाकडी दांडके आदी हत्यारांचा वापर करण्यात आला. संतापात सुनील पावरा याने त्याच्याकडे असलेल्या गावठी कट्ट्यातून दोन राउंड फायर केले. यात अविनाश हा जागीच ठार झाला. तर सुखराम हे गंभीर जखमी झाले. त्यांच्यावर नंदुरबार जिल्हा रुग्णालयात उपचार सुरू असताना त्यांचा मृत्यू झाला. या घटनेमुळे नंदुरबार जिल्हा हादरला आहे. घटनेची माहिती मिळाल्यानंतर अतिरिक्त पोलिस अधीक्षक नीलेश तांबे, उपविभागीय पोलिस अधिकारी दत्तात्रय पवार, पोलिस निरीक्षक शिवाजी बुधवंत, साहाय्यक पोलिस निरीक्षक नितीन पाटील यांनी भेट दिली. गावात तणावपूर्ण शांतता असून, चोख पोलिस बंदोबस्त लावण्यात आला आहे.
