शिरपूर (प्रतिनिधी) गुरूवारी सायंकाळी पतीला स्वत:च भरपूर दारु पाजून त्याच्या डोक्यावर लाटण्याने वार करून बेशुद्ध केले. नंतर घरातील दोरीच्या सहाय्याने गळा आवळून पत्नीने पतीचा खून केल्याचा धक्कादायक प्रकार उघडकीस आला आहे. रामदास सिग्रेट पावरा असे मृताचे नाव आहे. या प्रकरणी सांगवी पोलिस ठाण्यात गुन्हा दाखल झाला आहे.
सांगवी (ता. शिरपूर) पोलिस ठाण्यांतर्गत असलेल्या झेंडे अंजनजवळचा पुट्यापाडा येथील रहिवासी सिग्रेट देवसिंह पावरा (वय ५६) यांनी शुक्रवारी (ता. २) रोजी पोलिसात आपला मुलगा रामदास पावरा याचा गुरूवारी (ता. १) सायंकाळी गहाण ठेवलेली वनजमीन सोडवण्याच्या वादातून मारहाण करुन खून झाल्याचे सांगितले. पोलिसांनी सर्व ताब्यात घेतले. पोलिस त्यांच्याकडे चौकशी सुरु केली.
दरम्यानच्या काळात मृत रामदास पावरा याची पत्नी सुनंदा उर्फ बेबीबाई रामदास पावरा ही घर सोडून पळून गेली होती. त्यामुळे पोलिसांना तिच्यावर संशय आला. पोलिसांनी तिचा शोध सुरू केला आणि तिला खैरखुटी येथून ताब्यात घेतले. चौकशी केल्यावर तिने खुन केल्याची कबुली दिली. पती रामदास रोज मद्यपान करून शारिरीक व मानसिक छळ करायचा. त्यामुळे १ जून रोजी सायंकाळी ७ वाजता पती रामदासला मद्य पाजून त्याच्या डोक्यात लाटण्याने वार केला. तसेच दोरीने गळा आळवल्याचे सुनंदा पावराने चौकशीत सांगितले. या प्रकरणी पोलिसांनी सुनंदा उर्फ बेबीबाई रामदास पावरा हिला अटक केली आहे.
