नागपूर (वृत्तसंस्था) हरिसाल येथील वन परिक्षत्र अधिकारी दीपाली चव्हाण यांच्या आत्महतेप्रकरणी चौकशी करण्यासाठी वन विभागाने ९ सदस्यीय चौकशी समिती गठीत केली आहे. विशेष म्हणजे या घटनेमध्ये दोन्ही अधिकाऱ्यांचे निलंबन झाले असताना व पोलिसांची चौकशी सुरु असताना वन विभागाने या दोन्ही अधिकाऱ्यांची खाते चौकशी करण्याऐवजी चौकशी समिती गठीत केली.
आत्महत्या प्रकरणाची सखोल चौकशी करण्यासाठी वन विभागाने ९ सदस्यीय चौकशी समिती गठित केली आहे. नागपूरचे प्रधान मुख्य वनसंरक्षक एम. के. राव हे या समितीचे अध्यक्ष आहेत. याप्रकरणी दोन अधिकाऱ्याचे निलंबन झाले असून पोलिस तपासही सुरू आहे. मात्र, वनविभागाने या दोन अधिकाऱ्यांची खाते चौकशी न करता चौकशी समिती स्थापन करून तपास करण्यात येणार आहे. ही चौकशी समिती दीपाली चव्हाण यांच्या सुसाइड नोटचा आधार घेऊन एकूण १६ मुद्द्यांवर चौकशी करणार आहे. विनोद शिवकुमार यांनी दीपाली चव्हाण यांना कसा त्रास दिला. तसेच सुसाइड नोटमध्ये नमूद घटनेची सखोल चौकशी करणे. दीपाली चव्हाण यांना उपवनरक्षकाने कोणती नियमबाह्य कामे करण्यास भाग पाडली याचीही तपासणी करण्यात येणार आहे.
९ सदस्यांच्या समितीत सहअध्यक्ष असलेले अपर प्रधान मुख्य वनरक्षक विकास गुप्ता, वनविकास महामंडळाच्या मुख्य महाव्यवस्थापक मीरा अय्यर, मेळघाटच्या विभागीय वन अधिकारी पीयूषा जगताप, अमरावती वन विभागाच्या सहाय्यक वनरक्षक ज्योती पवार, सामाजिक वनीकरणचे वन परिक्षेत्र अधिकारी कोकाटे, सेवानिवृत्त विभागीय वन अधिकारी किशोर मिस्त्रीकोटकर, सदस्य सचिवांनी ठरवलेला स्थानिक स्वयंसेवी संस्थेचा सदस्य आणि अमरावतीचे मुख्य वनरक्षक प्रविण चव्हाण यांचा समावेश आहे.
