मुंबई (वृत्तसंस्था) माजी भारतीय ऑलराऊंडर राजेंद्रसिंह जडेजा यांचं कोरोनानं निधन झालं आहे. त्यांच्या निधनामुळे भारतीय क्रिकेट विश्वाला धक्का बसला आहे. ते ६६ वर्षांचे होते. सौराष्ट्र क्रिकेट असोसिएशननं त्यांच्या निधनाची माहिती दिली आहे.
“कोरोनाशी लढताना राजेंद्रसिंह जडेजा यांचं दु:खद निधन झालंय. आमच्या संवेदना त्यांच्या परिवारासोबत आहेत. सौराष्ट्रच्या महान क्रिकेटपटूंपैकी ते एक होते. आज आम्हाला खूप दु:ख होतंय. ते आज आपल्यात नाहीत. त्यांना आदरांजली..”, अशा भावना सौराष्ट्र क्रिकेट संघाने व्यक्त केल्या आहेत.
राजेंद्रसिंह जडेजा उजव्या हाताने वेगवान गोलंदाजी करायचे त्याचबरोबर ते एक चांगले ऑलराऊंडर देखील होते. त्यांनी ५० फर्स्ट क्लास मॅचेस १३४ विकेट्स घेतल्या, ११ लिस्ट ए मॅचेसमध्ये १४ फलंदाजांना माघारी धाडलं. ५० फर्स्ट क्लास मॅचेसमध्ये त्यांच्या नावावर १५३६ रन्स आहेत तर १४ लिस्ट ए मॅचेसमध्ये त्यांच्या नावावर १०४ रन्स आहेत.
जडेजा यांनी ५३ प्रथम श्रेणी, १८ लिस्ट ए आणि ३४ टी ट्वेन्टी सामन्यात बीसीसीआयचे रेफ्री म्हणूनही काम पाहिलं. त्यांच्या उत्तम खेळाबद्दल आणि रेफ्री कामाबद्दल त्यांना पुरस्कारानेही गौरविण्यात आलं होतं. जडेजा सौराष्ट्र क्रिकेटच्या निवड समितीत देखील होते.
