चंदीगड (वृत्तसंस्था) पंजाबच्या लुधियानामध्ये एकाच कुटुंबातील चार जणांची निर्घुण हत्या केल्याची घटना समोर आल्यानंतर प्रचंड खळबळ उडाली आहे. या प्रकरणी पोलिसांनी हत्येचा गुन्हा दाखल करत तपासाला सुरुवात केलीय.
या घटनेत व्यावसायिक असलेले राजीव सूद यांची पत्नी सुनिता सूद, मुलगा आशिष, सून गरिमा आणि १३ वर्षीय मुलाची हत्या झाली आहे. मृत सर्वांची हत्या ही धारधार शस्त्राने करण्यात आली होती. दरम्यान, घटनेवेळी राजीव सूद हे घरी नव्हते, असेही पोलिसांनी सांगितले. सून गरिमाचे वडील जेव्हा तिला भेटण्यासाठी घरी आले, तेव्हा त्यांनी बराच वेळ बेल वाजवली, दार ठोकले, पण कुणीही दार उघडले नाही. त्यानंतर त्यांनी शेजारी आणि पोलिसांना याची सूचना दिली. या घटनेमागे कौटुंबिक वाद असल्याची शक्यता पोलिसांनी व्यक्त केली आहे. पोलिसांना राजीव सूदची गाडीही मिळाली आहे. पोलिसांना ही गाडी जळालेल्या अवस्थेत मिळाली आहे. मात्र, कारमध्ये कुणीही नव्हतं. राजीव सूद हे सध्या बेपत्ता आहेत.
