अमळनेर ( प्रतिनिधी ) – उसनवार दिलेले ५ हजार रुपये परत देत नाही, म्हणून चौघांनी एकाला धारदार शस्राने व लोखंडी रॉडने मारहाण केल्याची घटना १५ रोजी रात्री ८ वाजता ताडेपुरातील भीमनगर येथे घडली.
ताडेपुरातील फकिरवाडा येथील रोहित भरत फतरोड याने विकी सपकाळे यांच्याकडून १५ दिवसांपूर्वी ५ हजार रुपये उसनवार घेतले होते. ते ५ हजार रुपये मागण्यावरून विक्की त्याच्याशी भांडण करत होता. १५ रोजी वरर्णेश्वर महादेव मंदिरावर कुस्त्यांचा कार्यक्रम होता. तो पाहण्यासाठी रोहित गेला असता तेथे विक्की याने ५ हजार रुपयांच्या व्याजाची मागणी सुरू केली. तेव्हा रोहितने व्याजाबाबत काहीच बोलणे झाले नव्हते, असे सांगितले. त्यानंतर त्याने घरी येऊन व्याज वसूल करेल, असे सांगून तो निघून गेला. तर रात्री ८ वाजता विकी, राज जिभाऊ वाघ, गुड्ड्या रमेश वाघ, अनिल अरुण वाघ यांना सोबत घेवून विकी आला. तसेच रोहितला लाथा बुक्क्यांनी मारहाण सुरू केली. विकीने त्याच्या हातातील धारदार शस्राने कपाळावर वार केल्याने रोहितच्या कपाळातून रक्त आले. तर राज वाघ याने लोखंडी रॉडने पायाच्या टाचेवर मारहाण केली. गुडड्याने लोखंडी सळईने तर अनिल वाघ याने खाली पडून काठीने मारहाण केली. दरम्यान, आजूबाजूच्या लोकांनी हे भांडण सोडवले. त्याच वेळी या सर्वांनी व्याज दिले नाही, तर तुला जिवंत सोडणार नाही, अशी परत धमकी दिली. दरम्यान, रोहितला उपचारसाठी ग्रामीण रुग्णालयात दाखल केले. त्यांनतर पुढील उपचारसाठी धुळे येथील हिरे वैद्यकीय महाविद्यालयात दाखल केले आहे. या प्रकरणी अमळनेर पोलीस ठाण्यात चौघांविरुद्ध विविध कलमान्वये गुन्हा दाखल करण्यात आला आहे. तपास पोलीस उपनिरीक्षक नामदेव बोरकर करत आहेत.
