कासोदा, ता. एरंडोल (प्रतिनिधी) येथून जवळच असलेल्या अडगाव ते कासोदा रोडवरील पाटाच्या चारीजवळ दुपारी २.४५ वाजेच्या सुमारास दुचाकी (एमएच १९, डीडी- ४५४१) व भरधाव वेगाने येणारी महिंद्रा कंपनीच्या मॅक्स (एमएच २०, सीजी ३००१) या चारचाकीच्या समोरासमोर झालेल्या धडकेत दुचाकीस्वार सत्यवान शामराव गायकवाड (वय २७) हा जागीच ठार झाला. तर या अपघातात दुचाकीवर मागे बसलेला रवींद्र गुलाब लोंढे हा जखमी झाला आहे.
हा दुचाकीचालक भडगावकडून कासोद्याकडे येत होता. त्याला एरंडोल येथील ग्रामीण रुग्णालयात नेले असता तपासणी करुन डॉक्टरांनी त्यास मृत घोषित केले. त्यानंतर शवविच्छेदन करून कासोदा येथे त्याचा मृतदेह रात्री उशिरा आणण्यात आला. दरम्यान, मयत सत्यवान गायकवाड यांचे भाऊ माधवराव गायकवाड यांनी दिलेल्या फिर्यादीवरून या संदर्भात गुन्हा दाखल करण्याचे काम उशिरापर्यंत सुरू असल्याचे पोलीस सूत्रांनी सांगितले.
