नाशिक (वृत्तसंस्था) इन्स्टाग्रामवरील मैत्री अल्पवयीन मुलीला चांगलीच महागात पडली आहे. नाशिकमध्ये एक भलताच प्रकार समोर आला आहे. एका तरुणाने प्रेमाचा बनाव करत अल्पवयीन मुलीला जाळ्यात ओढल्याचा आरोप आहे. पीडित मुलगी गरोदर राहिल्यानंतर ही घटना उघडकीस आली आहे. याप्रकरणी सातपूर पोलीस ठाण्यात गुन्हा दाखल केला असून संशयित आरोपी तरुणाला ताब्यात घेण्यात आलं आहे.
संबंधित आरोपी आणि पीडित मुलगी दोघंही नाशिकमधील रहिवासी आहे. काही दिवसांपूर्वी दोघांनी इन्स्टाग्रावरून एकमेकांना फॉलो केलं होतं. यानंतर दोघांत बातचित व्हायला सुरुवात झाली. यानंतर संबंधित तरुणानं प्रेमाचा बनाव करत अल्पवयीन मुलीला आपल्या प्रेमाच्या जाळ्यात ओढलं. तसेच पीडितेसोबत घट्ट मैत्री असल्याचं सांगून विश्वास संपादन केला. दरम्यानच्या काळात आरोपीनं पीडितेची वारंवार भेट घेत तिच्याशी शारीरिक संबंध प्रस्थापित केले. यातूनच ही अल्पवयीन मुलगी गरोदर राहिली. यानंतर घाबरलेल्या मुलीनं तिच्यासोबत घडलेला सर्व प्रकार आपल्या आई वडिलांना सांगितला.
याप्रकरणी पीडितेच्या आई वडिलांनी आरोपी तरुणाविरुद्ध गुन्हा दाखल केला आहे. पोलिसांनी बाल लैंगिक अत्याचारासहित अन्य कलमांतर्गत गुन्हा दाखल केला आहे. पीडित अल्पवयीन मुलीवर सध्या जिल्हा रुग्णालयात उपचार सुरू आहेत. याप्रकरणी पुढील तपास सातपूर पोलीस करत आहेत.
