जळगाव (प्रतिनिधी) पाच वर्षांपासून पोलिसांना गुंगारा देणारा दरोड्यातील संशयित प्रथमेश उर्फ डॉन प्रकाश ठमके (वय २४, रा. उल्हासनगर, जि. ठाणे) याला एमआयडीसी पोलिसांनी अटक केली आहे. पोलिसांना बघताच पळून जात असतांना पोलिसांनी सिनेस्टाईल पाठलाग करुन संशयिताला ताब्यात घेतले.
ठाणे व पालघर येथे टाकलेय मोठे दरोडे !
प्रथमेश उर्फ डॉन याने ठाणे व पालघर येथे मोठे दरोडे टाकले आहे. दरोडा टाकल्यानंतर मुद्देमाल घेवून संशयित प्रथमे हा फरार होवून जायचा. त्याच्याविरुद्ध राज्यासह इतर राज्यात देखील दरोड्यासह इतर वेगवेगळे १६ गंभीर गुन्हे दाखल आहेत. गेल्या पाच वर्षांपासून ठाणे, पालघर पोलिसांसह राज्यातील वेगवेगळ्या ठिकाणचे पोलिस त्याचा शोध घेत होते.
हालचालींवरुन हेरले !
प्रथमेशचे काही नातेवाईक जळगावात राहतात. त्यामुळे तो जळगावात आला असून सिंधी कॉलनीत असल्याची माहिती एमआयडीसी पोलिसांना मिळाली. त्यानुसार उपविभागीय पोलिस अधिकारी संदीप गावित यांच्या मार्गदर्शनाखाली आणि पोलिस निरीक्षक जयपाल हिरे यांच्या मार्गदर्शनाखाली एका पथक तयार आले. त्यानंतर प्रथमेश उर्फ डॉनला शिताफीने अटक करण्यात आली. एमआयडीसी पोलिसांना संशयित प्रथमेच याच्या लोकेशन किंवा इतर कोणतीही माहिती नव्हती. तरी देखील पथकाने संशयिताच्या हालचालींवरुन त्याला हेरले आणि त्याच्या मुसक्या आवळीत अटक केली.
पोलिसांना पाहताच ठोकली धूम !
सिंधी कॉलनीत संशयित प्रथमेश हा फिरत असतांना पथकातील पोलिस उपनिरीक्षक दत्तात्रय पोटे, रुपाली महाजन, जिल्हा विशेष शाखेचे सहायक फौजदार दिनेश बडगुजर, पोकॉ अमित मराठे, पोलिस नाईक जुबेर तडवी हे पोहचले. पोलिसांना बघताच संशयित प्रथमेशने तेथून पळ काढला.
अडीच किमीपर्यंत पाठलाग करुन घेतले ताब्यात !
पोलिसांच्या पथकाला बघताच आता पोलिस आपल्याला ताब्यात घेणार याची कुणकुण लागताच प्रथमेश ठमके हा तेथून पळाला. परंतु पथकाने त्याचा अडीच कि.मी. पळत जाऊन संशयिताचा पाठलाग केला. त्यानंतर त्याला जिल्हापेठ पोलिसांच्या मदतीने ताब्यात घेण्यात आले. त्याला ठाण्याच्या सहायक पोलिस निरीक्षक रुपाली पोळ यांच्या ताब्यात दिले आहे.
