मुंबई (वृत्तसंस्था) नागरिकत्व संशोधन कायदा आणि राष्ट्रीय नागरिक नोंदणी विरोधी आंदोलनाचा चेहरा आणि ‘शाहीनबाग दादी’ म्हणून प्रसिद्धी मिळालेल्या बिल्किस बानो पुन्हा एकदा चर्चेत आल्या आहेत. अलिकडेच प्रदर्शित झालेला हॉलिवूडचा सिनेमा ‘वंडर वुमन १९८४’ मध्ये प्रमुख भूमिका निभावणारी प्रसिद्ध अभिनेत्री गॅल गडोट हिने बिल्किस बानो यांना खऱ्याखुऱ्या जीवनातील आश्चर्यकारक महिला अर्थात ‘वंडर वुमन’ असं म्हटलंय.
हॉलिवूडची प्रसिद्ध अभिनेत्री आणि वंडरवुमनच्या भूमिकेने सर्व जगाला भूरळ घालणाऱ्या गॅल गडोटने शाहीन बागच्या ‘बिलकीस दादी’ला भेटण्याची इच्छा व्यक्त केली आहे. गॅल गडोटने न्यूईयरच्या निमित्ताने वर्षभरात चर्चेत आलेल्या काही महिलांचे फोटो शेअर केले आहेत. या महिला तिच्या दृष्टीने २०२० मधील वंडर वुमन्स असल्याचं गॅल गडोटने सांगितलं आहे. अशातच तिने आपल्या या खास यादीमध्ये शाहीन बागमधील ‘बिलकीस दादी’ यांचाही समावेश केला आहे. या पोस्टमध्ये गॅल गडोटने इतरही अनेक महिलांचे फोटो शेअर केले आहेत. त्याचसोबत कॅप्शनमध्ये #MyPersonalWonderWomen हा हॅशटॅगही वापरला आहे. २०२०मधील आश्चर्यकारक महिलांचे फोटो शेअर करताना, “काही माझ्या खूप जवळच्या आहेत…काही प्रेरणादायी महिला आहेत…तर काही असाधारण महिलाही आहेत ज्यांची भविष्यात भेट होईल अशी आशा आहे. आपण एकत्र आलो तर अनेक आश्चर्यकारक बाबी करू शकतो”, अशा आशयाचा मेसेज गडोटने लिहिला आहे. गडॉटने शेअर केलेल्या वंडर वुमन लिस्टमध्ये बिल्कीस बानो यांच्याशिवाय अमेरिकेच्या नव्या उपराष्ट्राध्यक्ष कमला हॅरिस, न्यूझीलंडच्या पंतप्रधान जेसिंडा अर्डर्न, गल गडॉटच्या कुटुंबातील महिला आणि काही मैत्रिणींचे फोटोही आहेत. तसेच गडोटने शेअर केलेली पोस्ट नेटकऱ्यांच्या चांगलीच पसंतीस पडली असून युजर्स तिच्या पोस्टवर अनेक प्रतिक्रिया देत आहेत.
गेल्या वर्षी म्हणजेच, २०२० मध्ये शाहीन बागच्या आंदोलनात ‘बिलकीस दादी’चं नाव खूप चर्चेत आलं होतं. नागरिकत्व दुरुस्ती कायद्याविरोधात शाहीन बाग येथे पार पडलेल्या आंदोलनात ८२ वर्षीय ‘बिलकीस दादी’ने उपस्थित राहत सर्वांचं लक्ष आपल्याकडे वेधलं होतं. एवढंच नाहीतर ‘बिलकीस दादी’ला शाहीन बागची दादी म्हणूनही ओळखलं जाऊ लागलं आहे.
नागरिकत्व दुरुस्ती कायद्याविरोधात शाहीन बाग येथे आंदोलन सुरु होतं. दिवस-रात्र हे आंदोलन सुरु होतं. यावेळी बिलकीस दादी केवळ महत्त्वाच्या क्षणीच नाहीतर, सकाळपासून रात्रीपर्यंत या आंदोलनासाठी उपस्थित राहिली होती. तसेच त्यावेळी बोलताना या आंदोलनाला शेवटपर्यंत पाठींबा देणार असल्याचंही बिलकीस बानो यांनी त्यावेळी सांगितलं होतं. तसेच टाईम मॅगझिनने २०२० च्या १०० सर्वाधिक प्रभावशाली व्यक्तींमध्येही बिलकीस बानो यांचा समावेश केला होता.
