चोपडा (प्रतिनिधी) हातेड-लासुर रस्त्यावर चाळीसगाव तालुक्यातील हिरापूर येथील अट्टल गुन्हेगार श्याम नामदेव चव्हाण व समीर शुभान सय्यद या दोघांना दोन गावठी कट्टे व जिवंत काडतुससह रंगेहाथ पकडल्याची घटना दि १० रोजी दुपारी ४ वाजेच्या सुमारास घडली.
चोपडा ग्रामीण पोलीस ठाण्याचे पोलीस उपनिरीक्षक अमरसिंग वसावे यांच्या पथकाला दोन जण गावठी कट्टे आणि काडतूससह जात असल्याची माहिती मिळाली. त्यानुसार तालुक्यातील हातेड- लासुर रस्त्यावर काळ्या व पांढऱ्या रंगाची बजाज कंपनीच्या दुचाकीवरून (एमएच 19 बी वाय 3413)पारउमर्टी येथून चाळीसगाव जात असतांना श्याम नामदेव चव्हाण उर्फ सॅम(२४),समीर शुभान सय्यद(२३, दोघे रा हिरापूर ता. चाळीसगाव) यांच्याकडून चोपडा ग्रामीण पोलिसांनी १ लाख ५ हजार किंमतीचे दोन गावठी कट्टे,३ हजार किंमतीचे सहा जिवंत काडतुसे,पन्नास हजार किंमतीची मोटार सायकल असा एकूण १ लाख ५८ हजार किंमतीचा मुद्देमाल हस्तगत केला. ही रवाई चोपडा ग्रामीण पोलीस ठाण्याचे पोलीस उपनिरीक्षक अमरसिंग वसावे,पोहेकॉ लक्ष्मण शिंगाणे,राकेश पाटील,किरण धनगर,पोना किरण पाटील,पोकॉ दिलीप पाटील यांनी केली आहे.पुढील तपास पोलीस उपनिरीक्षक अमरसिंग वसावे हे करीत आहे.
आरोपी श्याम चव्हाण सराईत गुन्हेगार- पो नि के के पाटील !
ताब्यातील मुख्य आरोपी श्याम नामदेव चव्हाण उर्फ सॅम हा सराईत गुन्हेगार असून त्याच्यावर चाळीसगाव शहर पोलीस ठाण्यात मोक्का अंतर्गत मी कारवाई केली आहे. तो सराईत गुहेगार असून चाळीसगाव पोलीस ठाण्यात त्याच्यावर वेगवेगळे गुन्हे दाखल आहेत. गावठी कट्टे घेऊन त्याने चाळीस गावात दहशत निर्माण करण्याचा त्याचा इरादा असल्याचे दिसून येत असल्याची माहिती ग्रामीण पोलीस ठाण्याचे प्रभारी पोलीस निरीक्षक के.के. पाटील यांनी सांगितले.
