मुंबई (वृत्तसंस्था) महाराष्ट्रात राष्ट्रवादीच्या जन्मानंतर जातीयवाद वाढला, असा पुनरुच्चार मनसे अध्यक्ष राज ठाकरे यांनी केला. त्यानंतर राष्ट्रवादीचे विविध नेते राज ठाकरेंवर तुटून पडले. आज प्रबोधनकार ठाकरेंचा विचार सांगणारं ट्विट करत राज ठाकरे यांनी राष्ट्रवादीवर वार केला आहे. राज्यकर्त्यांनी समाज-विकासावर मोठमोठी व्याख्याने देणे, म्हणजे बांडगुळानेच झाडाचं रक्त शोषणं होय!”, असं ट्विट त्यांनी केलं आहे.
मनसे अध्यक्ष राज ठाकरे यांनी राष्ट्रवादी काँग्रेसवर केलेल्या आरोपानंतर राजकारणाल ऊत आला आहे. राष्ट्रवादी काँग्रेसचे अध्यक्ष शरद पवार यांनी राज ठाकरे यांना प्रबोधनकार ठाकरे यांचं लिखाण वाचण्याचा सल्ला दिला होता. त्याला राज ठाकरेंनी पुण्यातील पत्रकार परिषदेत प्रत्युत्तर देत प्रबोधनकार आणि दिवंगत यशवंत चव्हाण यांची पुस्तकं वाचली आहेत, असा टोला हाणला होता. आता मनसे अध्यक्ष राज ठाकरे यांनी सूचक ट्वीट केलं आहे. प्रबोधनकार ठाकरे यांच्या माझी जीवनगाथा या पुस्तकातील संदर्भ देणारं ट्वीट केलं आहे.
“जिथे चिकित्सा-स्वातंत्र्य नाही, तिथे बौध्दिक विकास नाही… जिथे बौध्दिक विकासाला बंदी, तिथे राज्यकर्त्यांनी समाज-विकासावर मोठमोठी व्याख्याने देणे, म्हणजे बांडगुळानेच झाडाचं रक्त शोषणं होय!”- प्रबोधनकार ठाकरे, ‘माझी जीवनगाथा’, असं ट्वीट मनसे अध्यक्ष राज ठाकरे यांनी केलं आहे.
