जळगाव (प्रतिनिधी) – परिमंडलातील 1 लाख 90 हजार 433 लाख पर्यावरणस्नेही वीजग्राहकांनी छापील कागदाचा पूर्णपणे वापर बंद करीत पेपरलेस वीजबिलास पसंती दिली आहे. महावितरणच्या ‘गो-ग्रीन’ उपक्रमात या ग्राहकांना वार्षिक 2 कोटी 28 लाख 51 हजार रुपयांचा थेट फायदा होत आहे.
महावितरणकडून पर्यावरणपूरक ‘गो-ग्रीन’ योजनेतून वीज बिलासाठी छापील कागदाचा वापर कमी करण्यावर भर देण्यात आला आहे. कागदी बिलाऐवजी फक्त ‘इमेल’ व ‘एसएमएस’चा पर्याय निवडल्यास प्रतिबिलात 10 रुपये सवलत देण्यात येत आहे. त्यामुळे ग्राहकांचा वीजबिलामध्ये वार्षिक 120 रुपयांचा आर्थिक फायदा होत आहे. विशेष म्हणजे गो-ग्रीन योजनेचा पर्याय निवडल्यानंतर संबंधित ग्राहकांच्या पहिल्याच वीजबिलामध्ये पुढील 12 महिन्यांची म्हणजे 120 रुपयांची सवलत एकरकमी देण्यात येत आहे. पूर्वी ही सवलत प्रत्येकी 10 रुपये प्रत्येक बिलामध्ये मिळत होती.
महावितरणच्या संगणक प्रणालीमध्ये वीजबिल तयार झाल्यानंतर लगेचच संबंधित ग्राहकांना नोंदणीकृत ‘इमेल’वर व मोबाईलवर ‘एसएमएस’द्वारे दरमहा वीजबिल पाठविण्यात येत आहे. वीजबिलांच्या तारखेपासून सात दिवसांमध्ये रकमेचा तत्पर भरणा केल्यास एक टक्के सवलत दिली जाते. त्यासाठीही वीजबिल तात्काळ ऑनलाईनद्वारे भरणे सोयीचे झाले आहे. वीजग्राहकांना इमेलद्वारे प्राप्त झालेले दरमहा वीजबिल संगणकात सॉफ्ट कॉपीमध्ये जतन करून ठेवता येते. यासह महावितरणच्या www.mahadiscom.in या अधिकृत संकेतस्थळावर चालू वीजबिलासह मागील 11 महिन्यांचे असे एकूण 12 महिन्यांचे वीजबिले मूळ स्वरुपात उपलब्ध आहेत. आवश्यकतेप्रमाणे वीजग्राहकांना ते कधीही डाऊनलोड करण्याची किंवा मूळ स्वरूपात रंगीत प्रिंट करण्याची सोय आहे.
गो ग्रीन उपक्रमात सहभागी ग्राहकांची संख्या
जिल्हा ग्राहक वार्षिक बचत (रुपयांत)
जळगाव 1,13,454 1,36,14,480
धुळे 49,459 59,35,080
नंदुरबार 27,520 33,02,400
जळगाव परिमंडल 1,90,433 2,28,51,960
महावितरणच्या गो-ग्रीन उपक्रमात ग्राहकांना वार्षिक 120 रुपये सवलत मिळत आहे. छापील बिल टाळून ई-बिल घेतल्याने ग्राहकांना प्रॉम्प्ट पेमेंट व ऑनलाईन बिल भरणा सवलत सहज मिळते. सर्व वीजग्राहकांनी या पर्यावरणपूरक उपक्रमात सहभागी व्हावे.
– आय.ए. मुलाणी, मुख्य अभियंता, महावितरण, जळगाव परिमंडल
