रावेर (प्रतिनिधी) रावेर पोलिसांनी १५ मार्च रोजी भोकरी फाट्यावर एका व्यापाऱ्याकडे रेशनचा माल असलेल्या संशयित वाहन पकडले होते. परंतू याप्रकरणी तक्रारदार दिनेश भोळे यांनी गुन्हा दाखल करण्याची मागणी करून देखील कारवाई होत नाहीय. त्यामुळे ही बाब रेशन माफियांसाठी खुशखबर असून माल पकडल्यावर ‘रावेर पॅटर्न’ वापरल्यास होणार नाही कारवाई, असा संदेश जात असल्याची जिल्ह्यात चर्चा आहे.
रावेर तालुक्यात सध्या गाजत असलेला रेशनचा गहू आणि तांदूळ प्रकरणाची कारवाई पोलिस प्रशासनाने केली होती. रावेर पोलिसांनी १५ मार्च रोजी भोकरी फाट्यावर एका व्यापाऱ्याकडे रेशनचा माल असलेल्या संशयित वाहन पकडले होते. त्यादिवशी पोलीस कार्यालयामार्फत तहसील कार्यालयाला सदरील माल हा रेशनचा आहे किंवा कसा याची तपासणी करण्यासंदर्भात पत्र प्राप्त झाले होते. या कार्यालयाने घटनास्थळावर जाऊन फक्त धान्याचे नमुने घेऊन जळगाव येथे तपासणीसाठी पाठवले होते.
यानंतर रेशनचे सील गोडावून अहवाल येण्यापूर्वीच व्यापाऱ्याच्या ताब्यात देण्यात आले होते. त्यामुळे माहीती अधिकार कार्यकर्ते तथा तक्रारदार दिनेश भोळे यांनी पोलीस निरीक्षक, तहसीलदार, पुरवठा निरीक्षक, तलाठी कोतवाल आणि होमगार्ड यांनी योग्य कारवाई केली नसल्याने कारवाई न करताच सिल केलेले गोडाऊन व्यापाऱ्यांच्या ताब्यात देऊन मोठ्या रकमेची देवाण-घेवाण झाल्याचा गंभीर आरोप करत खळबळ उडवून दिली होती.
या प्रकारात देवाणघेवाणीतून प्रकरण मिटवले जात असल्याचा आरोप करत जिल्हा पोलीस अधीक्षक जिल्हाधिकारी, जिल्हा पुरवठा अधिकारी यांच्याकडे रावेर येथील पोलीस प्रशासन आणि महसूल प्रशासनाच्या वरिष्ठ अधिकाऱ्यांसह कर्मचाऱ्यांच्या सखोल चौकशीची मागणी करून दोषींवर कठोर कारवाई करण्याची मागणी केली होती. त्यावर रावेर पोलिसांनी महसूल विभागाकडून अहवाल प्राप्त झालेला नाही. अहवाल प्राप्त झाल्यानंतर पुढील कारवाई करण्यात येणार असल्याचे म्हटले होते. तर जिल्हा पुरवठा अधिकारी यांनी गुन्हा दाखल करण्याची प्रक्रिया तहसीलदार करतील आमच्या कार्यालयाकडे कोणताही पत्रव्यवहार प्राप्त झालेला नसल्याचे म्हटले होते.
थोडक्यात माल सापडला पण कारवाई कोणतीच होत नाहीय. महसूल आणि पोलीस प्रशासन एकमेकाकडे टोलवाटोलवी करत आहे. त्यामुळे रेशनचा काळाबाजार करणारे निर्धास्त होतील. अगदी जिल्ह्यातील रेशन माफियांसाठी खुशखबर असून माल पकडल्यावर ‘रावेर पॅटर्न’ वापरल्यावर कारवाई होणार नाही, अशी संतप्त प्रतिक्रिया तक्रारदार दिनेश भोळे यांनी दिली आहे.
