चंद्रपूर (वृत्तसंस्था) १५ व्या वित्त आयोगामधून केलेल्या योगा शेड बांधकाम बिलाच्या मोबदल्यात १३ हजारांची लाच घेताना पोंभुर्णा तालुक्यातील उमरी पोतदार येथील ग्रामसेवकाला पोलिसांनी शुक्रवारी रंगेहाथ अटक करण्यात आली. देवानंद मुरलीधर गेडाम, असे लाचखोर ग्रामसेवकाचे नाव आहे.
सन २०२१ २०२२ मध्ये जिल्हा परिषद चंद्रपूर अंतर्गत योगा शेडचे बांधकाम मंजूर झाले होते. बांधकाम अंदाजे किंमत ३ लाख ४९ हजार ३२१ रुपयांचे पूर्ण केले होते. सदर योगा शेड बांधकामाकरिता लागलेल्या साहित्याचे पुरवठाचे ग्रामसेवक यांनी २ लाख ४४ हजार ५२५ रुपयांचे बिल ग्रामसेवक देवानंद गेडाम यांनी काढून दिल्यानंतर तक्रारदार उर्वरित मजुरांची रक्कम काढून देण्याकरिता ग्रामसेवक देवानंद गेडाम यांना भेटले. त्यांनी यासाठी कामाची अंदाजे किंमत ३ लाख ४९ हजार ३२१ रुपयांचे पाच टक्के प्रमाणे १७ हजार ५०० रुपये लाचेची मागणी केली.
तक्रारदाराला लाच देण्याची मुळीच इच्छा नसल्याने ग्रामसेवकाविरुध्द लाचलुचपत प्रतिबंधक विभाग, कार्यालय चंद्रपूर येथे तक्रार दाखल केली. तक्रारीवरून शुक्रवार, ६ ऑक्टोबर २०२३ रोजी केलेल्या पडताळणी कार्यवाही दरम्यान आरोपी ग्रामसेवक देवानंद मुरलीधर गेडाम याने झालेल्या कामाचे पाच टक्के प्रमाणे १७ हजार ५०० रुपये लाचेची मागणी करून तडजोडीअंती १३ हजार रुपये स्विकारण्याची तयारी दर्शविली. त्यावरून ग्रामपंचायत कार्यालय उमरी पोतदार येथे पंचासमक्ष सापळा रचून ग्रामसेवक देवानंद गेडाम याला १३ हजार रुपयांची लाच स्विकारताना रंगेहात अटक करण्यात आली.
ही कारवाई लाचलुचपत प्रतिबंधक विभागाचे नागपूर विभागाचे पोलीस उपायुक्त राहुल माकणीकर, अप्पर पोलीस अधीक्षक संजय पुरंदरे तसेच चंद्रपूर येथील उपअधीक्षक मंजुषा भोसले यांच्या मार्गदर्शनात पोलीस निरीक्षक जितेंद्र गुरनुले, संदेश वाघमारे, राकेश जांभुळकर, अमोल सिडाम, प्रदीप ताडाम यांनी पार पाडली.
